Mae'r Grant Cyfleusterau i'r Anabl ar gael ar gyfer amryw o waith a fydd yn helpu person anabl i gynnal ei annibyniaeth yn y cartref.

Gallwch chi ymgeisio am grant os ydych chi:

  • yn denant neu'n berchen ar eiddo
  • yn landlord (ar ran tenant sy'n anabl)

Does dim rhaid i'r person sy'n ymgeisio am y grant fod y person anabl sydd angen yr addasiadau.

Serch hynny, bydd gofyn i'r ceisydd lofnodi tystysgrif yn nodi bydd y person anabl yn byw yn y tŷ sy'n cael ei addasu am o leiaf pum mlynedd. Gall yr amser fod yn llai oherwydd iechyd y person anabl neu ffactorau perthnasol eraill.

Bydd rhaid i bwy bynnag sy'n ymgeisio am y grant ddangos tystysgrif perchnogaeth neu denantiaeth.

Pa fath o waith sy'n gymwys ar gyfer Grant Cyfleusterau i'r Anabl?

Mae modd cael grant ar gyfer addasiadau hanfodol i roi rhagor o ryddid i berson anabl symud o gwmpas yn ei gartref. Mae'r gwaith yn cynnwys:

  • gwneud drysau'n fwy llydan neu osod rampiau
  • darparu ystafell sy wedi’i haddasu’n arbennig lle mae hi’n ddiogel i berson anabl fod heb oruchwyliaeth 
  • gosod lifft grisiau er mwyn cael mynediad gwell at dŷ bach, cegin neu ystafell wely
  • gosod tŷ bach lawr llawr
  • gwella neu osod system gwresogi sy'n addas ar gyfer y person anabl
  • addasu'r offer rheoli gwres neu olau i fod yn haws i'r person anabl

Oes rhaid i'r Cyngor roi Grant Cyfleusterau'r Anabl i mi?

Bydd raid i'r Cyngor sicrhau bod y gwaith:

  • yn angenrheidiol
  • yn briodol
  • yn rhesymol
  • yn ymarferol
  • yn bosibl

Bydd therapydd galwedigaethol fel arfer â mewnbwn er mwyn sicrhau bod y gwaith yn angenrheidiol ac yn briodol ar gyfer y person anabl.

Gall y Cyngor wrthod rhoi grant os nad yw'r cynllun yn cwrdd â'r meini prawf.

Sut mae cyfrifo’r Grant Cyfleusterau i'r Anabl?

Mae'r grant yn cael ei gyfrifo drwy brawf modd er mwyn sicrhau bod y rheiny sydd angen y cymorth fwyaf yn ei gael.

Bydd hyn yn cael ei gyfrif drwy incwm a chyfalaf:

  • y person anabl
  • gŵr / gwraig / partner y person anabl

Bydd yn ystyried:

  • incwm wythnosol y person ar gyfartaledd
  • unrhyw arbedion dros swm penodol

Dyw rhai budd-daliadau, yn enwedig y rheiny sy'n cydnabod anabledd y person, heb eu cynnwys.

Byddwch chi’n derbyn grant llawn os oes llai o arian gyda chi na'ch anghenion sylfaenol sy wedi'u hasesu.

Efallai y byddwch chi’n cael eich ystyried ar gyfer Grant Atodol Addasiadau i’r Anabl (DASG) ar gyfer rhan o gostau'r gwaith os oes mwy o arian nag anghenion (sy wedi'u hasesu) gyda chi, a grant am weddill y costau.

Os ydy'r addasiadau ar gyfer plentyn neu berson ifanc sydd heb gyrraedd 20 oed, fydd y rhieni ddim yn gorfod cael prawf modd.

Sut rydw i'n ymgeisio?

Cysylltwch gan ddefnyddio'r manylion uchod. Byddan nhw'n gallu dweud pa ddogfennau ategol bydd angen arnoch chi. Rhowch wybod os ydy'r gwaith ar frys.

Bydd angen i chi sicrhau bod cymeradwyaeth rheoliadau adeiladu wedi cael ei rhoi cyn dechrau'r gwaith, neu ganiatâd cynllunio.

Fyddwch chi ddim yn cael unrhyw grant os ydych chi wedi dechrau'r gwaith cyn i'r Cyngor gadarnhau eich cais.

Rhaid cyflwyno'r cais cyn gynted ag sy'n bosibl.

Byddwch chi’n cael gwybod os ydych chi wedi derbyn grant, mewn ysgrifen, o fewn chwe mis o gyflwyno'r cais.

Beth yw’r grant mwyaf ar gyfer Grant Cyfleusterau i'r Anabl?

Y grant mwyaf ydy £36,000 gan gynnwys holl ffioedd a chostau cynorthwyol.

Sut bydd y grant yn cael ei dalu?

Gall y Cyngor dalu'r grant mewn rhandaliadau wrth i'r gwaith fynd yn ei flaen neu unwaith i'r gwaith gael ei gwblhau.

Dim ond pan fydd y Cyngor yn fodlon bod y gwaith wedi’i wneud yn iawn yn unol ag amodau a thelerau’r grant bydd y Cyngor yn rhoi’r arian ichi.  

Dim ond os bydd y Cyngor yn derbyn anfoneb gymeradwy bydd modd talu’r grant.

Mae modd i’r Cyngor dalu’r grant yn uniongyrchol i’r contractwr neu mewn modd y byddwch chi’n gallu’i dalu unwaith bydd y gwaith wedi’i orffen.  

Fyddwn ni ddim yn derbyn anfonebau am waith neu wasanaeth sy wedi’i ddarparu gan y ceisydd neu aelod o’i deulu.

Dim ond anfonebau am ddeunyddiau neu wasanaethau sy wedi’u prynu byddwn ni’n eu talu os bydd y ceisydd neu berthynas yn gwneud y gwaith.  

Beth yw'r amodau?

Os bydd swm y grant yn fwy na £5000, bydd gofyn i chi lofnodi cytundeb sy’n datgan y byddwch chi’n ad-dalu’r grant os byddwch chi’n gwerthu’r eiddo o fewn 5 mlynedd i gwblhau’r addasiadau.

Serch hynny, os bydd yr eiddo wedi’i addasu’n cael ei werthu i landlord cymdeithasol cofrestredig, fydd y cymhorthdal ddim yn cael ei hawlio’n ôl.

Os bydd swm y grant yn llai na £5,000, fydd dim amodau grant.

Cysylltu â ni

Uned Tai'r Sector Preifat
Tŷ Elái
Ystad Ddiwydiannol Dinas Isaf
Trewiliam
Tonypandy
CF40 1NY

Ffôn: 01443 425749

 

Helpwch ni i wella - peidiwch â chynnwys gwybodaeth bersonol neu ariannol, e.e. eich Rhif Yswiriant Gwladol neu fanylion cerdyn credyd.