Beth bynnag eich hoff weithgaredd, byddwch chi’n siŵr o gael llawer o hwyl wrth aros yn Rhondda Cynon Taf.
Mae nifer o weithgareddau ar gael, gan gynnwys cerdded, beicio, marchogaeth a physgota. Byddwch chi bendant yn cael profiad ysbrydoledig a chreadigol yng ngwarchodfeydd natur Rhondda Cynon Taf, p’un ai’ch bod chi’n dewis mynd ar daith ffurfiol, ymweld ag achlysuron tymhorol, neu ymweld â’r ardal gyda’ch ffrindiau a’ch teulu.
Cerdded a beicio 
Mae'r milltiroedd o lwybrau trwy gefn gwlad Rhondda Cynon Taf yn denu beicwyr a cherddwyr, ac mae’r Rhwydwaith Beicio Cenedlaethol yn gwasanaethu'r ardal yn dda. Pontypridd yw canolbwynt y Rhwydwaith Beicio Cenedlaethol yn Ne Cymru – dyma le mae’r Llwybr Celtaidd yn croesi Taith Taf, ac mae’r dref hefyd yn fan dechrau’r Llwybr Lefel Uchel heriol dros Lanwynno a mynyddoedd y Maerdy a’r Rhigos.
Mae llwybrau gyda marciau ffordd yn arwain i fannau mwyaf prydferth ein hardal.
Mwynhewch y rhaeadrau trawiadol, megis Pen Pych neu Sgwd yr Eira yn ardal ‘Gwlad y Sgydiau’.
Rhaeadr Pen Pych, Blaen-cwm
Ymlaciwch ar lan y llynnoedd ym mharciau gwledig Cwm Dâr, Glyncornel, Garw-nant neu Barry Sidings.
Parc Gwledig Barry Sidings, Trehafod 
Mae parciau gwledig ein hardal yn ei gwneud hi’n hawdd cyrraedd cefn gwlad.
Mae’r rhwydwaith o lwybrau gyda marciau ffordd yn cynnig dewisiadau o ran trefnu teithiau cerdded, sy’n berffaith ar gyfer teuluoedd a phobl hŷn.
Mae gwersi beicio’n cael eu cynnal ddydd Mawrth rhwng 10am ac 1pm ym Mharc Gwledig Barry Sidings, Trehafod. Mae teithiau byr ar gael er mwyn magu hyder, a theithiau hirach i Nantgarw, Pont-y-gwaith ac Abercynon.
Mae’n bosibl rhentu treiciau, tandemau ochr-wrth-ochr, tandemau, seddi babanod ac ôl-gerbydau i blant am ddim bob dydd Mawrth a dydd Iau rhwng 10am a 3pm, a hynny fel rhan o gynllun Mentro Allan sy'n cael ei gynnal gan Sustrans. Mae gwasanaeth ailgylchu beiciau a gwasanaeth cynnal a chadw beiciau hefyd ar gael. Mae diodydd poeth a bisgedi ar gael am ddim yn y ganolfan i ymwelwyr ac mae croeso i bawb.
Mae cerdded Nordig yn ddull gwych o ymarfer corff, ac mae’n cael ei gynnal bob dydd Gwener rhwng 1pm a 3pm ym Mharc Gwledig Barry Sidings. Mae’n bosibl dewis teithiau hir ar hyd llwybrau serth, neu deithiau hamddenol ar hyd llwybrau gwastad, a hynny gydag arweinwyr a hyfforddwyr profiadol. Mae polion cerdded a lluniaeth ar gael am ddim.
Parc Gwledig Cwm Dâr, Aberdâr
Mae sesiynau beicio mynydd ar gyfer dechreuwyr yn cael eu cynnal o amgylch Cwm Dâr bob dydd Mercher rhwng 11am a 3pm. Mae eisiau cwrdd y tu allan i uned 39, Ystad Ddiwydiannol Aberaman er mwyn dilyn taith o amgylch y Parc Gwledig a'r ardal leol. Am ragor o wybodaeth, ffoniwch Eleanor Rothwell ar 0788 755 1303 neu anfonwch neges e-bost i eleanor.rothwell@sustrans.org.uk|
Taith Taff 
Mae Taith Taf yn 55 milltir o hyd ac mae'n troelli’i ffordd drwy gefn gwlad prydferth a hanesyddol cymoedd De Cymru.
A hithau'n ymestyn rhwng Caerdydd a Pharc Cenedlaethol Bannau Brycheiniog, mae Taith Taf yn rhwydwaith o lwybrau a theithiau cylchol sy’n cynnig cyfle i archwilio nifer o fannau diddorol a hanesyddol.
Llwybr Lefel Uchel (Rhif 47)
Dewch i archwilio cefn gwlad ar lwybr 24 milltir (38km) o hyd rhwng Pontypridd a Chastell-nedd.
Dyma un llinyn o’r Rhwydwaith Beicio Cenedlaethol ac mae’n croesi’r coedwigoedd uchel rhwng Pontypridd a Chastell-nedd. Mae’n dilyn ffyrdd trwy’r goedwig a llwybrau cul yn bennaf, ac mae nifer o lethrau serth ac wynebau garw mewn mannau.
Mae rhagor o wybodaeth ynglŷn â llwybrau beicio lleol ar gael ar y wefan www.sustrans.org.uk|.