Posted: 30/11/2021
Dewch â'ch teulu ynghyd a mynd ar antur
Dewch â'ch teulu a ffrindiau ynghyd a mynd ar antur yn Rhondda Cynon Taf, De Cymru.
Rydyn ni'n gartref i rai o'r profiadau mwyaf anhygoel yn Ne Cymru. Cewch chi hedfan oddi ar gopa mynydd, mynd am dro i weld golygfeydd gwych machlud haul neu fwynhau nofio gwyllt.
Cewch chi feicio, cerdded, mynd ar gefn ceffyl neu redeg drwy dirwedd dramatig gyda rhai o'r golygfeydd gorau.
Mwynhewch fwyd a diod anhygoel, ymlacio yn sbas moethus, gwireddu'ch ysfa i deithio, a chael hwyl gyda'ch teulu neu ffrindiau.
Ewch amdani!
Dyma'r profiad adrenalin diweddaraf o'r cwmni byd-enwog o Gymru. Does dim atyniad tebyg yng Nghanolbarth Cymru nac yn Ne Cymru. Phoenix yw'r wifren wib gyflymaf o'i math yn y byd. Dyma gyfle i chi hedfan oddi ar gopa Mynydd Rhigos, dros y goedwig a chronfa ddŵr Llyn Fawr.
Ble i aros
Mae Bird's Farm yn cynnig ystod o lety hunanddarpar gyda thwbâu twym, gan gynnwys y ffermdy, y stablau, Tŷ'r Adar a faniau ceffylau Hetti a Harri sy'n cynnig cyfleusterau glampio cyfforddus.
Dyma leoliad anhygoel os oes gyda chi garafán, cerbyd gwersylla neu gerbyd modur. Mae Parc Gwledig Cwm Dâr yn safle achrededig Awyr Dywyll Cymru, sy'n golygu ei fod yn cynnig amodau perffaith yn ystod y nos ar gyfer syllu ar y sêr. Gosodwch y crogwely neu glustogau ar y llawr ac ymlaciwch o dan y sêr a'r cytserau.
Mae dros 200 o erwau i'w harchwilio ym Mharc Gwledig Cwm Dâr. Dewch â'ch beic mynydd eich hun neu logi un i fynd ar lwybrau llawn cyffro Parc Beiciau Disgyrchiant ar gyfer Teuluoedd.
Crwydrwch y mynyddoedd rhewlifol sy'n amgylchynu'r parc i weld rhai o'r golygfeydd gorau – yn enwedig wrth i'r haul fachlud.
Dewch i wledda yn Black Rock Café, ar y safle. Mae prydau'n cael eu gwneud ar y safle gyda chynnyrch ffres, lleol.
Ble i aros
Ym Mharc Gwledig Cwm Dâr! Fel arall, mae croeso i chi ddod â'ch carafán, cartref modur neu gerbyd gwersylla (dim pebyll) ac aros ar y safle gyda chyflenwad trydan a chyfleusterau golchi llestri a chawodydd modern ar gael. Mae Black Rock Café yn lleoliad perffaith i fwynhau brecinio.
Does dim geiriau i ddisgrifio’r olygfa – dim ond dau fynydd pen bwrdd sydd yn Ewrop a dyma un ohonyn nhw! Mae'r golygfeydd o gopa'r mynydd yn anhygoel, a hynny yn ystod y dydd, gyda'r nos, ac wrth i'r haul godi neu fachlud.
Ble i aros
Mae Gwesty'r Dunraven wedi'i leoli dan gysgod mynydd Pen-pych ac mae'n lleoliad perffaith i ddechrau antur. Mae bwyd a diod gwych ar gael, gan gynnwys pizza wedi'i goginio mewn ffwrn goed, ac mae'n gwahodd cwmnïau eraill i gymryd rhan yn ei achlysuron bwyd stryd, gyda nifer o themâu gwahanol, gan gynnwys bwydydd y Caribî.
Beicio Mynydd
Mae gormod o lwybrau beicio ar ein mynyddoedd i'w rhestru! Peth call fyddai mynd ar eich beic a'u crwydro nhw! Cadwch lygad allan am feysydd parcio Cyfoeth Naturiol Cymru, sy'n ddechreubwynt llwybrau i'r goedwigaeth ac i'r mynyddoedd. Mae'r briffordd dros y Bwlch yn un o rannau anoddach y ras Dragon Ride trwy Dde Cymru.
Ble i aros
Mae gan Eglwys Sant Alban yn Nhreherbert, sy'n hen gapel hyfryd, ddigon o le i 10 person aros, yn ogystal â chyfleusterau storio beiciau.
Cronfa Ddŵr Maerdy
Mae'r Rhwydwaith Beicio Cenedlaethol a hen Ffordd Coed Morgannwg yn mynd trwy'r safle hanesyddol yma. Mae modd i chi weld adfeilion Castell Nos o hyd. Credir i'r castell gael ei adeiladu gan Arglwyddi Cymreig Meisgyn, disgynyddion Iestyn ap Gwrgant, Brenin Cymreig olaf Morgannwg.
Ble i aros
Mae Bethel Nook yn ardal Rhigos yn rhandy hyfryd gyda mesanîn sy'n berffaith i'r rheiny sy'n chwilio am rywle i ymlacio ar ddiwedd diwrnod prysur.
Llanwonno
Mae coedwigaeth Llanwynno yn llawn chwedlau. Cerddwch neu feicio trwy'r goedwigaeth i gyrraedd cronfa ddŵr Clydach a rhaeadrau Pistell Golau. Mae tafarn y Brynfrynnon yn lle gwych i gymryd saib – cewch chi fwynhau golygfeydd gwych o'r dafarn hefyd.
Ble i aros
Mae Bythynnod Tunnel yn Aberdâr yn cynnig ystod o fythynnod a stiwdios ac maen nhw dan gysgod Bannau Brycheiniog.
Bwlch
Mae'r mynydd yma'n llawn llwybrau cerdded – rhagor yma.
Mae hefyd yn fan gwych i fwynhau paned a hufen iâ.
Ble i aros
Mae Bwthyn Glowyr Blaen-cwm yn boblogaidd iawn, gan gynnig llety clyd yn nhref hardd a chyfeillgar Blaen-cwm, ger Treorci.
Mae tîm anhygoel y Ganolfan yma, sydd wedi'i leoli mewn ffermdy yng nghanol bryniau Cwm Taf, yn cynnig antur i chi. Mae'n addas i grwpiau o bob maint ac mae llwybrau beicio cwad, cyfleusterau dringo, llwybrau cerdded bryniau, gweithgareddau cerdded ceunentydd, saethyddiaeth a llawer yn rhagor ar gael. Bydd y tîm yn trefnu llety hefyd i chi os bydd eisiau.
Ble i aros
Mae lle i bedwar person aros ym Mwthyn Fferm Lan yng Ngraig-wen, Pontypridd. Edrychwch ar y golygfeydd hyfryd!
Gofyn am e-lyfryn
Diolch:
Carly Davies
Martin Agg
Delme Thompson
Lee Williams
Heritage Hiker
Smile with Kyle
Scenic Footprints
Matthew Carpenter
For letting us use their stunning pictures.