Pa gyfleusterau ac offer fydd ar gael i fi?
Bydd gan bob grŵp gwleidyddol fynediad i ystafell breifat ar y safle yn adeiladau'r Cyngor i gynnal cyfarfodydd mewnol. Mae Siambr y Cyngor yn fodern ac yn hygyrch, ac mae ei chyfleusterau cyfarfodydd hybrid yn rhoi hyblygrwydd i Gynghorwyr ymuno â chyfarfodydd o bell neu wyneb yn wyneb.
Bydd pob Cynghorydd yn cael cymorth digidol wedi'i deilwra i'w anghenion, gan gynnwys darparu dyfeisiau priodol a chymorth technegol.
Pa gefnogaeth mae cynghorwyr yn ei chael i’w helpu yn eu rôl?
Bydd pob Cyngor yn rhedeg rhaglen ymsefydlu i aelodau newydd ddangos i chi pwy yw pwy, a rhaglen i'ch helpu chi i ddeall eich rôl, gweithdrefnau'r Cyngor a'r sgiliau ymarferol sydd eu hangen arnoch chi, er enghraifft sut i gadeirio cyfarfod.
Mae hyfforddiant parhaus yn cael ei ddarparu'n rheolaidd, a hynny i unigolion ac ar sail fforwm agored. Mae hyn yn cynnwys cymorth mewn meysydd megis llywodraethu, sgiliau digidol, ymgysylltu â'r cyfryngau, a defnyddio'r cyfryngau cymdeithasol yn ddiogel.
Mae gan bob Cynghorydd hefyd gyfle i weithio gyda'r Swyddog Ymchwil yn Uned Busnes y Cyngor i gynorthwyo Cynghorwyr i ddatblygu eu gwaith.
Mae'r Cyngor yn gweithio'n galed i sicrhau ei fod yn cyd-fynd â Safonau'r Gymraeg. Mae dogfennau'r cyfarfodydd ar gael yn ddwyieithog yn unol â Safonau'r Gymraeg ac mae cyfieithu ar yr un pryd ar gael yn ystod y rhan fwyaf o gyfarfodydd.
Mae gen i anabledd, a fydd y Cyngor yn darparu'r cymorth sydd ei angen arnaf?
Bydd. Bydd y Cyngor yn eich cefnogi ac yn darparu ar gyfer eich anabledd chi. Bydd y Cyngor yn darparu'r trefniadau mynediad sydd eu hangen arnoch chi. Rhaid i adeiladau'r Cyngor fod yn hygyrch i bobl anabl, yn unol â'r gyfraith.
Mae gan ymgeiswyr anabl hawl i gyllid i'w helpu gydag unrhyw gostau ychwanegol sy'n gysylltiedig â'u nam a allai fod yn rhwystr iddynt sefyll fel cynghorydd.
Mae gyda fi gyfrifoldebau gofalu, pa gefnogaeth fyddai ar gael i mi i ymgymryd â'm rôl yn Gynghorydd?
Mae gan gynghorwyr hawl i gyfraniad tuag at gostau gofal i'r rhai maen nhw'n gofalu amdanyn nhw, neu am eu cefnogaeth bersonol eu hunain. Trefnir yr amserlen ar gyfer cyfarfodydd y Cyngor er mwyn osgoi gwyliau ysgol lle bo hynny'n bosibl. Mae trefniadau cyfarfodydd hybrid hefyd yn cynnig hyblygrwydd mewn perthynas â mynychu cyfarfodydd.
A yw cynghorwyr yn cael tâl am eu gwaith?
Mae pob Cynghorydd yn derbyn cyflog sylfaenol. Mae gan gynghorwyr hefyd hawl i gael lwfansau teithio. Yn ogystal â hynny, mae modd i chi hawlio'ch cyflog wrth gymryd absenoldeb teuluol e.e. absenoldeb rhiant.
Bydd y cynghorwyr hynny sy'n ymgymryd â chyfrifoldebau ychwanegol, e.e. bod yn aelod o'r Cabinet, yn gadeirydd pwyllgor neu'n arweinydd eu grŵp gwleidyddol, yn derbyn taliad ychwanegol. Gelwir hyn yn 'gyflog uwch' ac mae'n cael ei gyfrifo ar sail maint y Cyngor. Mae rhagor o wybodaeth ar gael yma.