Diolch i bawb a gefnogodd Rasys Nos Galan 2024 - cadwch lygad barcud am newyddion ar gyfer 2025.
Beth yw pellter y ras?
Mae'r Ras Hwyl a'r Ras Elît yn 5 cilomedr. Mae'r rasys i blant (8 i 9 oed a 10 i 11 oed) yn un lap o'r dref (600m).
Mae’r rasys i blant (12 i 13 oed a 14 i 15 oed) yn 1.2 cilomedr, neu dau lap o’r dref.
Oes llwybr newydd ar gyfer 2024?
Mae llwybr 2024 yr un fath â’r llynedd. Bwriwch olwg ar y llwybrau, yma (byddan nhw hefyd yn eich pecyn rasys).
Ga i gofrestru ar y noson?
Rhaid cadw lle a thalu amdano cyn yr achlysur. Does dim modd i ni gofrestru pobl ar y noson.
A oes modd rhedeg mewn gwisg ffansi?
Oes, rydyn ni wrth ein boddau yn gweld pobl yn mwynhau’r ras hwyl mewn gwisg ffansi.
Cadwch at y canllawiau canlynol os ydych chi’n dewis rhedeg mewn gwisg ffansi:
- Peidiwch â gwisgo gwisgoedd y mae modd eu hystyried yn dramgwyddus neu'n beryglus i wylwyr neu gystadleuwyr eraill.
- Rhaid i'r gwisgoedd (unigol neu grŵp) fod o faint priodol (h.y. rhaid iddyn nhw beidio â bod yn fwy na 900mm mewn diamedr) er mwyn caniatáu i gystadleuwyr eraill fynd heibio'n ddiogel yn ystod y ras.
- Rhaid i’r gwisgoedd beidio â chyfyngu ar allu’r cystadleuwyr i gystadlu.
- Rhaid gwisgo’r gwisgoedd a pheidio â’u gwthio na'u tynnu - h.y. cadeiriau gwthio neu drolïau.
Os dydych chi ddim yn siŵr a yw eich gwisg ffansi yn addas, cysylltwch â ni er mwyn gwirio gyda ni. Os nad ydych chi’n cydymffurfio â´r canllawiau hyn, fyddwch chi ddim yn cael cymryd rhan yn y ras.
Oes modd i rywun arall ddefnyddio fy lle os does dim modd i mi redeg neu os ydw i'n penderfynu peidio â rhedeg?
Nac oes. Dim ond enw’r person sydd wedi’i gofrestru all redeg. Does dim modd i unrhyw un arall ddefnyddio eich rhif ras.
Pryd fydda i'n derbyn fy mib ar gyfer y ras?
Byddwch chi'n derbyn pecyn gwybodaeth yn cynnwys eich rhif ras (bib), sydd â sglodyn amseru yn rhan ohono. Bydd pecynnau rasys yn cael eu hanfon yng nghanol mis Rhagfyr, mewn da bryd ar gyfer yr achlysur.
|
Medal eleni
|
“This year’s medal”
|
Oes modd i mi gyfnewid rasys (h.y. symud o Ras Elît i'r Ras Hwyl neu i'r gwrthwyneb)?
Nac oes, yn anffodus. Mae'r holl leoedd yn y ddwy ras wedi'u gwerthu ac mae pawb wedi cael rhif rhedeg penodol, felly does dim modd eich symud i ras wahanol.
Faint o'r gloch mae'r achlysur yn dechrau?
Mae Rasys Nos Galan yn dechrau am 5pm gyda'r rasys i blant. Mae modd i chi lawrlwytho amserlen yr achlysur a llwybr y ras yma
Fydd rhaid cau'r ffyrdd?
Bydd. Bydd ffordd ar gau yn Aberpennar er mwyn sicrhau bod modd cynnal Rasys Nos Galan yn ddiogel. Caiff map o'r ardal a fydd ar gau ei gyhoeddi maes o law.
Ble ga i barcio ar y noson?
Bydd gwasanaethau Parcio a Theithio o Ysgol Gyfun Aberpennar (CF45 4DG) a Chae Rygbi Aberpennar/Canolfan Fowlio Dan Do Cwm Cynon (CF45 4DA). Cewch barcio yn y naill un o'r lleoliadau yma a bydd y bws yn mynd â chi rhyngddyn nhw â Neuadd y Dref, Aberpennar (safle bws Gwesty Aberdâr).
Ble ga i newid a gadael fy eiddo?
Canolfan Pennar/Llyfrgell Aberpennar yw'r ardal newid a storio penodedig. Bydd ar agor o 4.30pm tan 8.30pm ar gyfer y rheiny sy'n rasio yn unig. Sylwch, bydd unigolion yn cymryd cyfrifoldeb am adael eu heiddo yno. Mae’r ardal yma ar gyfer y rheiny sy’n cymryd rhan yn unig.
Ga i unrhyw beth am gwblhau'r ras?
Cewch. Bydd pawb sy'n cwblhau'r ras yn derbyn medal a chrys-t Rasys Nos Galan 2024 i goffau'r noson.
A fydd adloniant ar y noson?
Bydd. Bydd ffair hwyl fach i blant ym Maes Parcio Stryd Henry.
A fydd tân gwyllt?
Bydd. Bydd tân gwyllt enwog Rasys Nos Galan yn dychwelyd ar gyfer 2024.
A fydd rhedwr dirgel ar gyfer 2024?
Bydd. Ond pwy?!
Sylwch, bydd lluniau yn cael eu tynnu ar y noson ar gyfer hyrwyddo'r achlysur ar y cyfryngau cymdeithasol a chyfryngau eraill.
Telerau ac Amodau Nos Galan