Mae CYBI RhCT yn helpu'r Cyngor i ddefnyddio amrywiaeth o dystiolaeth a gwybodaeth i wneud penderfyniadau sydd o fudd i drigolion RhCT.
Beth yw Cydweithrediad Ymchwil ar Benderfynyddion Iechyd (CYBI)?
Rhannu Beth yw Cydweithrediad Ymchwil ar Benderfynyddion Iechyd (CYBI)? ar Facebook Rhannu Beth yw Cydweithrediad Ymchwil ar Benderfynyddion Iechyd (CYBI)? Ar Twitter Rhannu Beth yw Cydweithrediad Ymchwil ar Benderfynyddion Iechyd (CYBI)? Ar LinkedInE-bost Beth yw
Cydweithrediad Ymchwil ar Benderfynyddion Iechyd (CYBI)?
Beth yw CYBI (Cydweithrediad Ymchwil ar Benderfynyddion Iechyd)?
Mae Cydweithrediadau Ymchwil ar Benderfynyddion Iechyd (CYBI) yn helpu i roi hwb i'r gallu a’r capasiti i gyflawni gwaith ymchwil ym myd llywodraeth leol. Eu nod yw ymgorffori diwylliant o ddefnyddio tystiolaeth wrth wneud penderfyniadau ymhlith Cynghorau.
Mae'r CYBI yn defnyddio canfyddiadau ymchwil i ddeall sut mae penderfyniadau'n effeithio ar iechyd ac anghydraddoldebau iechyd. Mae'r CYBI hefyd yn chwilio am gyllid i gynnal ymchwil lle nad oes tystiolaeth ar gael eisoes. Gelwir ffactorau a all effeithio ar iechyd rhywun yn 'benderfynyddion iechyd' ac mae modd i chi ddod o hyd i ragor o wybodaeth, neu brofi eich gwybodaeth am benderfynyddion iechyd yma: Beth yw penderfynyddion iechyd?
Mae Cydweithrediad Ymchwil ar Benderfynyddion Iechyd (CYBI) RhCT yn rhan o'r Sefydliad Cenedlaethol dros Ymchwil Iechyd a Gofal (NIHR) ac yn cael ei hwyluso gan Gyngor Bwrdeistref Sirol Rhondda Cynon Taf. Mae'r NIHR yn cyllido, galluogi a chyflawni ymchwil gofal iechyd a chymdeithasol mwyaf arloesol y byd sy'n gwella iechyd a lles pobl ac yn hyrwyddo twf yn yr economi.
Mae'r fideo byr yma gan ein hariannwr, NIHR, yn ddefnyddiol i ddeall beth yw ymchwil a pham ei fod yn bwysig.
Beth yw Cydweithrediad Ymchwil ar Benderfynyddion Iechyd Rhondda Cynon Taf?
Mae £5 miliwn wedi cael ei ddyfarnu i Gyngor Bwrdeistref Sirol Rhondda Cynon Taf (2023) gan Y Sefydliad Cenedlaethol dros Ymchwil Iechyd a Gofal er mwyn sefydlu Cydweithrediad Ymchwil ar Benderfynyddion Iechyd Rhondda Cynon Taf (CYBI RhCT). Y nod yw creu diwylliant ymchwil bywiog o fewn yr Awdurdod Lleol sy'n annog gwneud penderfyniadau sy'n seiliedig ar dystiolaeth a hynny er mwyn torri’r cylch tlodi, gwella cyfleoedd bywyd y bobl fwyaf difreintiedig, a mynd i'r afael â phenderfynyddion iechyd ehangach. Mae hyn yn cynrychioli:
- Ffordd newydd o weithio i'r Cyngor.
- Ffordd o rannu'r hyn rydyn ni yn RhCT yn ei wneud a dysgu gan eraill.
- Cyfle unigryw i wneud gwahaniaeth gwirioneddol a chynaliadwy i'r ffordd y mae gwasanaethau cyhoeddus yn cael eu darparu.
Mae CYBI RhCT yn bartneriaeth bwerus, sy'n ymateb i anghenion pobl a chymunedau yn RhCT. Mae ein partneriaid yn cynnwys:
- Dinasyddion sy'n byw, gweithio, astudio neu chwarae yn RhCT.
- Cyngor Rhondda Cynon Taf.
- Interlink Rhondda Cynon Taf (Cyngor Gweithredu Gwirfoddol)
- Bwrdd Iechyd Prifysgol Cwm Taf Morgannwg
- Iechyd Cyhoeddus Cymru.
- Ein cymuned ymchwil ym Mhrifysgol Caerdydd.
Beth fydd hyd prosiect CYBI RhCT?
Y bwriad yw y bydd CYBI RhCT yn gweithredu am bum mlynedd, Ionawr 2024 - Rhagfyr 2028.
Sut all CBS RhCT ddylanwadu ar effaith Penderfynyddion Iechyd?
Mae pethau fel arian, tai, addysg, a mynediad at wasanaethau yn cael effaith fawr ar ein hiechyd — nid yn unig yn gorfforol, ond hefyd yn feddyliol ac yn emosiynol. Mae llawer o broblemau iechyd yn gysylltiedig â sefyllfaoedd niweidiol, fel byw mewn tlodi neu dai gwael. Mae'r ffactorau cymdeithasol yma, fel cyflogau neu a oes modd i unigolion fanteisio ar gymorth meddygol, yn effeithio ar ba mor iach yw pobl a hyd yn oed pa mor hir y byddan nhw'n byw. Mae gan bawb brofiadau bywyd gwahanol, felly gall penderfynyddion iechyd amrywio'n fawr — hyd yn oed rhwng strydoedd cyfagos. Mae'r fideo byr yma gan ein hariannwr, yr NIHR, yn egluro pam bod penderfynyddion iechyd o ddiddordeb i'r Cyngor.