Cynllun Dyrannu Tai

Rhaid i'r Cyngor gael Cynllun Dyrannu sy'n egluro sut mae'n rhoi blaenoriaeth i rai grwpiau o bobl ar gyfer tai. Dyma'r grwpiau:

• Pobl sy'n ddigartref
• Pobl sy'n byw mewn tai sydd mewn cyflwr gwael neu sy’n orlawn.
• Pobl sydd angen symud am resymau meddygol neu les.
• Pobl sydd angen symud i ardal benodol o fewn ffiniau Rhondda Cynon Taf am reswm penodol, er enghraifft, edrych ar ôl aelod o'u teulu.

Mae Cynllun Dyrannu Tai presennol Cyngor Rhondda Cynon Taf wedi bod ar waith ers 2018. Mae'r Cyngor a'i bartneriaid, sy'n Gymdeithasau Tai, wedi bod yn adolygu'r Cynllun Dyrannu Tai.

Mae’r Cyngor am wneud rhai newidiadau i Gynllun Dyrannu a CeisioCartrefRhCT i wneud y gwasanaeth ar gyfer ymgeiswyr yn well.  Rydyn ni eisiau:

• Caniatáu i bobl sydd â dyled sy'n llai na'r hyn sy'n cyfateb i 8 wythnos o rent fod yn gymwys ar gyfer tai cymdeithasol. Ni fydd ymgeiswyr sydd ag ôl-ddyledion rhent / dyledion cyn-denantiaid neu denantiaid presennol sy'n fwy na'r hyn sy'n cyfateb i 8 wythnos o rent yn gymwys ar gyfer tai cymdeithasol, oni bai eu bod wedi cofrestru ar gyfer cynllun ad-dalu ac wedi gwneud ad-daliadau rheolaidd am 12 wythnos.
• Newid sut y caiff eiddo wedi'u haddasu eu dyrannu i ymgeiswyr drwy sicrhau bod eiddo wedi'u haddasu yn cael eu dyrannu i ymgeiswyr sydd angen yr un lefel o eiddo wedi'i addasu. Er enghraifft, pan fydd eiddo sydd wedi'i addasu'n llawn ar gael, caiff ei ddyrannu i berson sydd angen eiddo wedi'i addasu'n llawn, ac sydd â chais wedi'i gofrestru yn y band uchaf ac sydd wedi bod yn aros hiraf. 
• Sicrhau bod y Cynllun Dyrannu Tai yn cynnwys diffiniad clir o Droseddau Casineb a rhoi statws Band B i ymgeiswyr sy'n dioddef o Drosedd Casineb lle nad yw'n ddiogel iddyn nhw nac aelodau'u cartref aros yn eu cartref presennol.

 

Newidiadau rydyn ni eisiau eu cyflwyno

1. Ôl-ddyledion rhent a dyledion eraill sy'n gysylltiedig â thai

Ar hyn o bryd, nid yw ymgeiswyr sydd ag ôl-ddyledion rhent o dros £744 a/neu ddyled arall sy'n gysylltiedig â thai yn gymwys i ymuno â chofrestr CeisioCartrefRhCT. Dydy'r ffigur ddim yn berthnasol mwyach oherwydd costau uchel rhentu, yn enwedig o ystyried y gwahaniaeth rhwng rhenti tai cymdeithasol a llety rhent preifat.

Bydd ymgeiswyr sydd ag ôl-ddyledion rhent neu ddyled sy'n gysylltiedig â thenantiaeth flaenorol sy'n llai na'r hyn sy'n cyfateb i 8 wythnos o rent yn gymwys i ymuno â chofrestr CeisioCartrefRhCT a byddan nhw'n cael eu rhoi mewn Band sy'n berthnasol i'w hangen am dai.

Ni fydd ymgeiswyr sydd ag ôl-ddyledion rhent neu ddyled sy'n gysylltiedig â thenantiaeth flaenorol sy'n cyfateb i 8 wythnos o rent yn gymwys i ymuno â chofrestr CeisioCartrefRhCT nes eu bod wedi cofrestru ar gyfer cynllun ad-dalu ac wedi gwneud ad-daliadau rheolaidd am 12 wythnos (neu dri mis). Bydd ymgeiswyr nad ydyn nhw'n gymwys yn cael cynllun personol yn amlinellu'r camau gweithredu y mae angen iddyn nhw eu cymryd er mwyn i'w cais fod yn gymwys.

Unwaith y bydd ymgeisydd wedi talu ei ddyled, bydd dyddiad gwreiddiol y cais yn cael ei adfer (hyd at uchafswm o 6 mis). Os oes dyled yn dal i fod heb ei thalu ar ôl i daliadau gael eu cynnal am 12 wythnos, bydd yr ymgeisydd yn gymwys i ymuno â'r gofrestr ond rhaid iddo barhau i wneud ad-daliadau rheolaidd. Bydd unrhyw fethiant i gydymffurfio â’r cynllun ad-dalu yn golygu y bydd dyddiad cychwyn y cais yn cael ei wthio’n ôl 6 mis.

 

2. Eiddo wedi'i addasu

Ar hyn o bryd, mae eiddo wedi'i addasu yn cael ei ddyrannu ar sail dull paru gorau. Mae hyn yn golygu bod eiddo sydd ag addasiadau yn cael ei ddyrannu i'r person sydd angen yr addasiadau penodol i'r eiddo yn hytrach na'r sawl sydd wedi aros yr amser hiraf. O ganlyniad, gall rhai ymgeiswyr sydd angen addasiadau aros amser hir iawn i gael eu hailgartrefu weithiau. Mewn rhai achosion, caiff eiddo wedi'i addasu ei ddyrannu i rywun mewn band is am eu bod nhw angen yr holl addasiadau sydd wedi'u cynnwys yn yr eiddo sy'n cael ei ddyrannu. 

Bydd eiddo wedi'i addasu yn cael ei gategoreiddio naill ai fel eiddo Lefel 1 - Wedi'i Addasu'n Llawn, neu eiddo Lefel 2 - Hygyrch. Mae gan eiddo sydd wedi'u haddasu'n llawn addasiadau helaeth sy'n diwallu'r rhan fwyaf o anghenion, neu holl anghenion, ymgeiswyr sydd angen symud o gwmpas eu cartref gan ddefnyddio cadair olwyn.  Efallai y bydd gan eiddo hygyrch rai addasiadau neu newidiadau wedi'u gosod sy'n eu gwneud yn hygyrch ar gyfer anghenion pobl ag anawsterau symudedd.

Bydd ymgeiswyr yn cael eu paru â'r categori eiddo perthnasol yn gyntaf, er enghraifft naill ai eiddo wedi'i Addasu'n Llawn neu eiddo Hygyrch, yna yn ôl band (y person yn y band uchaf) ac yna yn ôl amser aros (yr ymgeisydd sydd wedi bod yn aros hiraf).

 

3. Troseddau Casineb/Cydraddoldeb

Yn ein Cynllun Dyrannu Tai does dim cyfeiriad penodol at Droseddau Casineb ar hyn o bryd.

Bydd y Cynllun Dyrannu Tai yn cynnwys diffiniad o Droseddau Casineb a bydd Band B yn cael ei ddyfarnu i ymgeisydd sy'n profi Trosedd Casineb ac sydd angen symud oherwydd nad yw'n ddiogel iddyn nhw nac aelodau'u cartref aros yn eu cartref presennol.

Bydd blaenoriaeth yn cael ei rhoi lle mae aflonyddu difrifol wedi'i brofi a bod tystiolaeth i ddangos nad yw'n rhesymol i'r ymgeisydd ac aelodau'i gartref aros yn eu heiddo. 

I gymryd rhan yn yr ymgynghoriad cliciwch ar y ddolen rctcbc.welcomesyourfeedback.net/s/housing_allocation_scheme

Bydd yr ymgynhoriad yn cau ar 12 Awst 2025 (5pm)