Mae'r dyn ifanc wedi gallu aros gyda'r teulu a ofalodd amdano drwy gydol ei blentyndod, diolch i gefnogaeth Cysylltu Bywydau De Ddwyrain Cymru.
Mae ei stori yn cael ei rhannu ar Ddiwrnod Rhyngwladol Gofal a Chymorth, er mwyn tynnu sylw at y ffordd y mae 'Cysylltu Bywydau' yn helpu oedolion i gael cymorth wedi'i deilwra iddyn nhw mewn amgylchedd teuluol, wrth ddatblygu eu hannibyniaeth, cynnal perthnasoedd pwysig, a chadw cysylltiad â'u cymunedau. Mae stori Daniel (llun ar y dde) a Kyle (llun ar y chwith) yn dangos y gwahaniaeth mae'r cymorth yma'n gallu gwneud a herio rhagdybiaethau ynghylch pwy sy’n gallu dod yn ofalwr.
Yn 21 oed, mae Kyle yn astudio yn y brifysgol, yn meddwl am ei yrfa yn y dyfodol ac yn cynorthwyo pobl drwy Cysylltu Bywydau. Mae'n debyg ei fod yn wahanol iawn i'r math o berson mae pobl yn meddwl amdano pan maen nhw'n meddwl am gynhaliwr.
Daeth Daniel, sy'n 20 oed, i fyw gyda theulu Kyle trwy'r rhaglen faethu pan oedd yn bump oed. Dros y blynyddoedd, daeth yn rhan o'r teulu, gan fyw gyda Kyle, ei rieni Jane a Dave, a pherson ifanc arall a gafodd ei gynorthwyo drwy faethu.
Wrth i Daniel agosáu at fod yn oedolyn, roedd ansicrwydd ynglŷn â beth fyddai'n digwydd nesaf. "Doeddwn i ddim eisiau newid gofalwyr," meddai Daniel. "Roeddwn i'n hoffi sut roedd pethau a doeddwn i ddim eisiau i unrhyw beth newid."
Yn ffodus, roedd opsiwn arall. Drwy gynllun Cysylltu Bywydau De-ddwyrain Cymru, daeth Jane a Dave yn ofalwyr Cysylltu Bywydau, gan ganiatáu i Daniel barhau i fyw gyda'r teulu roedd eisoes yn ei adnabod ac yn ymddiried ynddo.
Parhau gyda pherthnasoedd pwysig
I Kyle, roedd cymryd rhan yn Cysylltu Bywydau yn teimlo fel cam naturiol. Ar ôl cael ei fagu mewn cartref maethu, roedd wedi gweld drosto'i hun y gwahaniaeth y gall cymorth teuluol ei wneud.
"Daeth fy mhenderfyniad i ddod yn ofalwr Cysylltu Bywydau o drafodaethau o fewn fy nheulu am y dyfodol, yn enwedig wrth feddwl ymlaen llaw am sut byddai Daniel yn cael ei gynorthwyo pe bai rhywbeth yn digwydd i'm rhieni," meddai. "Roeddwn i eisiau ennill yr wybodaeth, y sgiliau a'r hyder i'w gynorthwyo a gwneud yn siŵr ei fod yn parhau i gael y cyfleoedd a'r cymorth sydd eu hangen arno."
Roedd cael ei fagu mewn cartref maethu wedi dangos i Kyle y gwahaniaeth y gall y cymorth cywir ei wneud. Roedd gweld pobl ifanc yn ffynnu wedi’i ysbrydoli e i gymryd mwy o ran ei hun.
"Wrth gael fy magu yn gweld y gwahaniaeth y gall maethu ei wneud i fywydau pobl ifanc, mae'n wych fy mod i bellach yn gallu cynorthwyo oedolion drwy Cysylltu Bywydau," meddai.
"Roeddwn i eisiau ennill profiad ymarferol ac adeiladu dealltwriaeth ddyfnach o sut i gynorthwyo pobl mewn ffordd sy'n hyrwyddo annibyniaeth, lles ac ansawdd bywyd."
Mae Kyle yn cynorthwyo Daniel drwy Cysylltu Bywydau wrth astudio yn y brifysgol. Mae'r pâr yn rhannu llawer o'r un diddordebau, gan gynnwys pêl-droed, teithio a threulio amser gyda'i gilydd. "Rydyn ni’n mynd ar wyliau gyda'n gilydd ac mae e wedi fy helpu gyda llawer o bethau," meddai Daniel.
Un o'u hoff weithgareddau ar y cyd nhw yw cefnogi West Ham United, ac maen nhw'n teithio i Lundain gyda'i gilydd yn rheolaidd i wylio’r gemau. "Rydw i'n mwynhau mynd i gemau pêl-droed yn Llundain gyda Dave a Kyle," meddai. Maen nhw hefyd wedi teithio ymhellach i ffwrdd, gan gynnwys teithiau i Baris a Dulyn. Wrth gynllunio teithiau, mae Kyle yn gwneud yn siŵr bod Daniel yn rhan o bob penderfyniad, o ddewis atyniadau i ddod o hyd i lety addas.
"Fe wnaethon ni drafod popeth gyda'n gilydd fel ei fod yn gwybod beth i'w ddisgwyl," meddai Kyle. "Fe wnaeth hyn helpu magu hyder a gwneud yn siŵr ei fod yn brofiad ystyrlon iddo fe."
Hyder ac annibyniaeth
Mae Daniel bellach yn mynd i'r coleg dri diwrnod yr wythnos ac yn parhau i adeiladu ei annibyniaeth gyda chymorth y rhai sydd o'i gwmpas. "Mae fy ngofalwyr yn fy nghynorthwyo i fod yn annibynnol ac i gadw'n ddiogel," meddai. "Maen nhw'n gwrando arna i ac yn caniatáu i mi fod yn fy hun. Maen nhw'n fy helpu i ddysgu sut i edrych ar ôl fy hun ac yn rhoi hyder i mi."
Mae Daniel yn dweud bod Cysylltu Bywydau wedi ei helpu e i deimlo'n fwy hyderus a sicr am y dyfodol. "Rydw i'n teimlo'n hapus ac wedi setlo. Dydw i ddim yn poeni mwyach y bydda i’n cael fy symud i rywle newydd."
I Kyle, un o'r rhannau mwyaf gwerth chweil o fod yn ofalwr Cysylltu Bywydau yw gweld pobl yn magu hyder ac annibyniaeth. "Yr hyn rydw i'n ei garu fwyaf yw cynorthwyo pobl i ddatblygu annibyniaeth, cyflawni eu nodau a phrofi pethau na fydden nhw, fel arall, yn cael y cyfle i’w gwneud."
Ochr yn ochr â chynorthwyo Daniel, mae Kyle hefyd yn darparu cymorth i bobl eraill drwy Cysylltu Bywydau. Yn syndod, mae'n dweud bod yr agwedd hon ar y rôl wedi cael yr effaith fwyaf arno. "Roedd y cymorth sesiynol yn fy synnu fwyaf," meddai. "Doeddwn i erioed wedi disgwyl cael y lefel o foddhad swydd rydw i'n ei gael. Rydw i wir yn teimlo fy mod i'n mynd allan gyda ffrindiau ac yn gwneud gwahaniaeth gwirioneddol i bobl a allai, fel arall, fod yn unig."
Mae Kyle yn credu bod Cysylltu Bywydau wedi ei helpu e i dyfu’n bersonol gymaint ag yn broffesiynol. "Mae'r bobl rydw i'n rhoi cymorth iddyn nhw yn dod â llawer iawn o lawenydd, chwerthin a phersbectif," meddai. "Nid yw'n ymwneud â darparu gofal yn unig. Mae'n ymwneud â rhannu profiadau, grymuso ein gilydd a magu perthnasoedd ystyrlon lle rydyn ni'n dysgu ac yn tyfu."
Edrych ymlaen
Mae Daniel yn gobeithio aros yn y coleg, parhau i ddatblygu ei annibyniaeth ac, yn y pen draw, gwneud rhywfaint o waith gwirfoddol. Yn bwysicaf oll, mae eisiau parhau i fyw gyda'r bobl sydd wedi ei gynorthwyo drwy gydol ei oes.
Mae Kyle yn gobeithio y bydd ei stori yn annog rhagor o bobl i herio rhagdybiaethau ynghylch pwy sy’n gallu dod yn ofalwr Cysylltu Bywydau. Mae llawer o bobl yn meddwl bod gofalwyr yn hŷn neu fod angen blynyddoedd o brofiad proffesiynol arnyn nhw cyn gallan nhw helpu. Mae profiad Kyle yn awgrymu fel arall.
"Mae Cysylltu Bywydau yn darparu hyfforddiant cynhwysfawr a chymorth parhaus ardderchog," meddai. "Rydw i'n teimlo fy mod i’n cael cymorth yn fy rôl ac yn hyderus y galla i ofyn cwestiynau pryd bynnag y bydd angen."
Pan gafodd e ofyn i grynhoi beth mae Cysylltu Bywydau yn ei olygu iddo, mae ateb Daniel yn syml, "Mae wedi rhoi teulu i mi y galla i fyw gyda nhw. Doeddwn i ddim eisiau newid gofalwyr ac mae hyn wedi golygu y galla i aros am byth."
Meddai'r Cynghorydd Gareth Caple, Aelod o'r Cabinet ar faterion Gofal Cymdeithasol: "Mae’n wych gweld y gwahaniaeth y mae Cysylltu Bywydau wedi’i wneud i Daniel, gan ei alluogi i aros gyda’r teulu y mae’n ei adnabod ac yn ymddiried ynddo, wrth barhau i feithrin ei hyder a’i annibyniaeth.
"Mae’r stori yma'n ffordd briodol o nodi Diwrnod Rhyngwladol Gofal a Chymorth, ac rydw i'n gobeithio ei bod wedi ysbrydoli rhagor o bobl i ystyried y gwahaniaeth maen nhw'n gallu ei wneud trwy ddod yn ofalwr ‘Cysylltu Bywydau’."
**Allech chi fod yn ofalwr Cysylltu Bywydau?**
Mae'r Cynllun Cysylltu Bywydau yn wasanaeth unigryw, arobryn yn y gymuned sy'n cynnig cymorth i oedolion i’w galluogi i fyw’n annibynnol mewn amgylchedd teuluol. Mae'r cynllun yn dod ag unigolion a gofalwyr Cysylltu Bywydau at ei gilydd. Mae’r gofalwyr yma'n darparu cymorth wedi'i deilwra ar gyfer yr unigolyn yn eu cartrefi eu hunain.
Mae Cysylltu Bywydau De-ddwyrain Cymru yn gweithio mewn partneriaeth â chynghorau Rhondda Cynon Taf, Caerffili, Casnewydd, Merthyr Tudful, Sir Fynwy, Blaenau Gwent a Thorfaen a Bwrdd Iechyd Prifysgol Aneurin Bevan.
Ar gyfer ymholiadau yn Rhondda Cynon Taf, ffoniwch ganolfan gyswllt y Cyngor ar 01443 425 003.
I gael rhagor o wybodaeth am y Cynllun Rhannu Bywydau:
Wedi ei bostio ar 29/10/2026