Gwasanaethau Cymorth ar Faterion Tai

Sut y mae modd i ni eich helpu chi?

Mae modd i'r Gwasanaethau Cymorth Materion Tai eich helpu chi i feithrin y sgiliau sydd eu hangen arnoch chi i fyw'n annibynnol. Mae hyn yn golygu mwy na sicrhau lle i fyw, mae'n golygu sicrhau bod modd i chi fyw'n annibynnol mewn amgylchedd diogel.

Mae modd i ni eich cefnogi chi p'un a ydych chi'n meddu ar denantiaeth neu'n berchennog tŷ, ac rydyn ni hefyd yn cynnig llety â chymorth.  Am ragor o wybodaeth, bwriwch olwg ar ein 'Cymorth ar Faterion Tai' yn y tudalennau perthnasol.

Mae modd i'r cymorth gynnwys:

• Cymorth wrth roi trefn ar y cartref ac edrych ar ei ôl, gan gynnwys rheoli tenantiaeth (dydy hyn ddim yn cynnwys gwaith tŷ).
• Cymorth gyda chyllido, dyledion (e.e. ôl-ddyledion rhent), budd-daliadau, rheoli arian a chynyddu incwm.
• Cymorth wrth feithrin sgiliau byw ymarferol.
• Cyfeirio at a chefnogi cysylltiadau ag asiantaethau eraill megis Gwasanaethau Cyffuriau/Alcohol, Meddyg Teulu, Iechyd Meddwl ac ati.
• Cymorth wrth chwilio am waith, derbyn hyfforddiant, gwirfoddoli neu ddod o hyd i weithgareddau yn eich ardal leol.
• Cyngor ar faterion sy'n ymwneud â thai, ôl-ddyledion, cael eich hel o'r tŷ ac ati.
• Cymorth wrth gwblhau neu ddarllen ffurflenni (e.e. llythyron a biliau).
• Cymorth wrth symud a dod o hyd i lety amgen.

Llety â Chymorth

Rydyn ni'n cynnig Llety â Chymorth sy'n seiliedig ar y meini prawf bod gan y cleient sy'n cael ei atgyfeirio ddyletswydd ddigartrefedd agored gyda Charfan Materion Tai RhCT neu ei fod yn unigolyn yn RhCT sy'n gadael gofal ac mae'r unigolyn wedi'i atgyfeirio gan y Gwasanaethau i Blant.

Os ydych chi'n ddigartref ar hyn o bryd ac mae angen i chi gysylltu â'r Garfan Materion Tai, cliciwch y ddolen isod: Digartrefedd - Cyngor a Chymorth | Cyngor Bwrdeistref Sirol Rhondda Cynon Taf

Pa wasanaethau sydd ar gael?

Mae ystod o wasanaethau ar gael, ac mae modd dod o hyd iddyn nhw yn y 'Cyfeiriadur Grant Cymorth Tai' yn y tudalennau perthnasol. Yn y cyfeiriadur mae rhestr o holl Wasanaethau Cymorth ar Faterion Tai yn RhCT ynghyd â lluniau o rai o'r prosiectau.

Pwy sydd â'r hawl i dderbyn Gwasanaeth Cymorth ar Faterion Tai?

Os ydych chi'n 16 oed neu'n hŷn ac yn byw yn Rhondda Cynon Taf, mae modd i chi atgyfeirio'ch hun at y Gwasanaeth, neu mae modd i aelod o'ch teulu neu ffrind, Gweithiwr Cymdeithasol, Swyddog Gyrfaoedd neu asiantaethau eraill sy'n gweithio gyda chi eich atgyfeirio chi.

Does dim modd i'r Gwasanaeth Cymorth Materion Tai wneud y canlynol:

• Rheoli eich arian
• Talu eich biliau
• Rhoi gofal personol i chi neu eich helpu i ymolchi a gwisgo (Byddwn ni'n eich helpu i wneud cais am wasanaethau gofal yn y cartref)
• Gwneud gwaith tŷ, coginio i chi neu gynnal gwaith atgyweirio ar eich cyfer (Byddwn ni'n eich helpu i roi gwybod am atgyweiriadau neu wneud cais am wasanaethau gofal yn y cartref)
• Bod yn gwmni i chi ar deithiau neu achlysuron neu roi lifft i chi i apwyntiadau
• Dod â dadleuon rhyngoch chi a phobl eraill i ben
• Darparu gwasanaeth cwnsela i chi

Sut mae cyflwyno cais am Gymorth Materion Tai?

Bwriwch olwg ar ein 'Ffurflen Atgyfeirio Cymorth Materion Tai’.

Mae modd i chi gwblhau ffurflen atgyfeirio eich hun, neu gall rywun arall ei chwblhau ar eich rhan chi. Os ydych chi'n derbyn cymorth gan weithiwr proffesiynol arall (e.e gweithiwr cymdeithasol, swyddog prawf ac ati), neu aelod o'ch teulu, bydd modd iddyn nhw eich helpu chi i gwblhau'r ffurflen yma.

Os ydych chi'n cwblhau'r ffurflen yma ar ran rywun arall, trafodwch y mater gyda fe/hi a gwnewch yn siŵr ei fod/ei bod hi'n cydsynio i dderbyn cymorth.  

Os oes gyda chi unrhyw ymholiadau pellach, os oes angen cymorth arnoch i gwblhau'r ffurflen atgyfeirio neu os ydych chi'n dymuno gwirio a ydych chi'n gymwys, cysylltwch â ni.

Manylion Cyswllt: