Bydd llwybrau traffig trwy safle gwaith deuoli’r A4119 rhwng cylchfannau Coed-elái ac Ynysmaerdy yn cael eu newid er mwyn i'r gwaith adeiladu fynd yn ei flaen. Bydd y newid cyntaf o nos Wener 8 (Medi) ar gyfer traffig tua'r de.
Bydd cynllun deuoli Coed-elái ar yr A4119 yn darparu 1.5 cilomedr o ffordd ddeuol o Gylchfan Coed-elái i Barc Busnes Llantrisant, a llwybr cymunedol a rennir ar hyd y cynllun. Bydd pont teithio llesol newydd hefyd yn cael ei darparu i gerddwyr a beicwyr groesi’r A4119 ychydig tua’r de o gylchfan Coed-elái, gan wella mynediad teithio llesol i’r pentref.
Dechreuodd y prif gam adeiladu yr haf diwethaf ac mae'n parhau i wneud cynnydd cadarnhaol tuag at ei gwblhau ar amser yn 2024. Mae'r gwaith tua hanner ffordd drwodd, ac yn ddiweddar mae'r contractwr Alun Griffiths (Contractors) Ltd wedi rhannu'r wybodaeth ddiweddaraf am y cynnydd yn ei fwletin prosiect diweddaraf ar gyfer mis Awst 2023.
Newid traffig mewn dau gam trwy gydol mis Medi
Rhan allweddol o'r cynnydd hyd yma fu adeiladu'r gerbytffordd newydd tua'r de ar gyfer y cynllun deuoli. Mae dwy geuffos amlbwrpas, ynghyd â nifer o waliau cynnal a nodweddion draenio priffyrdd, wedi'u gosod.
Unwaith y bydd y gerbytffordd tua'r de sydd newydd ei hadeiladu wedi'i hailwynebu, bydd y contractwr yn dechrau paratoadau i newid y trefniadau traffig fel bod gyrwyr (sy'n defnyddio'r A4119 bresennol ar hyn o bryd) yn teithio ar y rhan newydd yma o'r ffordd. Bydd y newidiadau yn digwydd mewn dau gam yn ystod mis Medi, fel yr amlinellir isod:
- Dros nos ar ddydd Gwener, 8 Medi, a dydd Sadwrn, 9 Medi – bydd traffig tua’r de o Gylchfan Coed-elái yn cael ei gyfeirio tua’r rhan newydd o’r ffordd gerbydau, gan ddychwelyd i deithio ar yr A4119 mewn man ger Fferm Dyffryn Isaf a pharhau i Gylchfan Gwasanaeth Tân ac Achub y De-orllewin. Bydd y trefniant yma'n parhau am sbel. Bydd traffig tua'r gogledd yn parhau i ddefnyddio'r A4119 ar hyn o bryd.
- Dros nos ddydd Gwener, 22 Medi (dyddiad heb ei gadarnhau eto, a allai newid) – bydd traffig tua’r gogledd yn cael ei gyfeirio’n glir o Gylchfan Gwasanaeth Tân ac Achub y De Cymru tua’r A4119 fel arfer. Yna mewn man ger Fferm Dyffryn Isaf bydd y llwybr yn ymuno â'r rhan newydd o'r ffordd gerbydau i gyrraedd Cylchfan Coed-elái. Bydd y trefniant yma'n parhau am sbel.
Cofiwch, bydd y terfynau cyflymder dros dro o 40mya a 30mya mewn gwahanol fannau trwy safle'r gwaith yn parhau yn eu lle, er mwyn hybu diogelwch.
Bydd y newidiadau sydd i ddod yn galluogi cam nesaf y cyfnod adeiladu – cael gwared ar yr hen gerbytffordd (A4119) ac adeiladu rhannau o’r ffordd newydd, gan gynnwys gwaith draenio, goleuo, ceuffos a mynediad cysylltiedig.
Meddai'r Cynghorydd Andrew Morgan OBE, Arweinydd Cyngor Rhondda Cynon Taf ac Aelod o'r Cabinet ar faterion Isadeiledd a Buddsoddi: “Mae'r gwaith i ddeuoli'r A4119 yng Nghoed Elái yn parhau i wneud cynnydd cadarnhaol iawn, ac mae tua hanner ffordd drwy'r cam adeiladu. Mae’r cynllun cyffredinol ar y trywydd iawn i gael ei gwblhau fel y cynlluniwyd ddiwedd haf 2024, i gyflawni’r buddsoddiad â blaenoriaeth yma i wella cysylltedd yn rhanbarth strategol Porth Rhondda yn sylweddol.
“Bydd y cynllun yn gwella llif y traffig yn yr ardal gymudo brysur yma, ac yn datgloi safle'r hen lofa, Parc Coed-elái – sy’n cael ei ddatblygu gan Lywodraeth Cymru a lleoliad uned fusnes fodern newydd y Cyngor. Mantais fawr arall yw cyflwyno llwybr cerdded a beicio rhwng Coed-elái ac Ynysmaerdy, a gwell mynediad teithio llesol ar gylchfan Coed-elái.
“Mae cynnydd rhagorol hyd yma wedi gweld adeiladu rhan newydd o’r ffordd a fydd yn dod yn ffordd ddeuol tua'r de yn y cynllun terfynol. Prif ffocws nesaf ein contractwr fydd disodli’r A4119 bresennol, i ddod yn gerbytffordd tua'r gogledd yn y cynllun terfynol. Bydd hyn yn cynnwys dau gam ym mis Medi, lle bydd traffig yn cael ei gyfeirio i ddefnyddio'r rhannau newydd.
“Bydd arwyddion clir ar gyfer y llwybrau dros dro newydd, a dylai pobl barhau i yrru’n ofalus drwy safle’r gwaith – yn enwedig wrth ddod i arfer â’r trefniadau newydd. Hoffwn ddiolch i ddefnyddwyr y ffyrdd a’r gymuned am eich cydweithrediad parhaus. Mae ein contractwr yn parhau i gyfathrebu â phreswylwyr sy’n byw gerllaw, wrth drefnu holl elfennau aflonyddgar y cynllun fel gweithio gyda’r nos, a chyfyngu ar aflonyddwch sŵn lle bo modd.”
Mae cynllun deuoli sylweddol yr A4119 wedi'i ariannu ar y cyd gan gyllid cyfalaf y Cyngor, dyraniadau Llywodraeth Cymru a phecyn gwerth £11.4 miliwn trwy Gronfa Ffyniant Bro Llywodraeth y DU yn 2021.
Wedi ei bostio ar 04/09/23