Mae ein Cynllun Cydraddoldeb Strategol presennol yn nodi sut mae’n ceisio bodloni ei ymrwymiad i gydraddoldeb a sut y bydd yn bodloni ei rwymedigaethau cyfreithiol yn unol â Deddf Cydraddoldeb 2010.
Unodd Deddf Cydraddoldeb 2010 gyfreithiau gwrth-gwahaniaethu, a disodli'r rhai blaenorol, er mwyn creu un Ddeddf. Yna, cyflwynodd ddyletswydd gyffredinol newydd ar y Cyngor i roi sylw dyledus i'r canlynol wrth wneud penderfyniadau a darparu gwasanaethau:
- Cael gwared â gwahaniaethu, aflonyddu, erledigaeth ac unrhyw ymddygiad arall sy’n cael ei wahardd o dan y Ddeddf.
- Hyrwyddo cyfleoedd cyfartal rhwng pobl sy’n rhannu nodweddion gwarchodedig penodol a phobl sydd ddim yn eu rhannu.
- Hybu perthynas dda rhwng pobl sy'n rhannu nodweddion gwarchodedig perthnasol a phobl sydd ddim yn eu rhannu.
Mae'r Ddeddf Cydraddoldeb yn rhoi pŵer i wneud rheoliadau sy'n gosod dyletswyddau ar gyrff cyhoeddus i gefnogi cyflawniad gwell o'r ddyletswydd gyffredinol. Rydyn ni'n galw'r rhain yn Ddyletswyddau Cydraddoldeb Penodol y Sector Cyhoeddus ac maen nhw'n wahanol yng Nghymru, Lloegr a'r Alban.
Mae Dyletswyddau Cydraddoldeb y Sector Cyhoeddus yng Nghymru, a ddaeth i rym ar 6 Ebrill 2011, yn cynnwys gofyniad i awdurdodau cyhoeddus (gan gynnwys Awdurdodau Lleol ac ysgolion) ddatblygu a chyhoeddi Cynllun Cydraddoldeb Strategol bob 4 blynedd. Dylai gynnwys Amcanion Cydraddoldeb a gwybodaeth am y broses ymgysylltu a gafodd ei chynnal er mwyn nodi'r rhain.
Mae Cynllun Cydraddoldeb Strategol yn nodi sut mae’r Cyngor wedi bodloni ei gyfrifoldebau cyfreithiol wrth ddatblygu'r Cynllun Cydraddoldeb Strategol. Mae’n cynnwys amcanion cydraddoldeb y Cyngor ar gyfer 2024-2028, sut maen nhw wedi'u nodi, yr agwedd a gafodd ei fabwysiadu o ran ymgysylltu â'r canlyniadau, ynghyd â chynllun gweithredu sy'n nodi sut bydd y Cyngor yn cyflawni'r amcanion. Mae Cynllun Cydraddoldeb Strategol yn cynnwys ymrwymiad i fonitro cyflawni cynllun gweithredu Cynllun Cydraddoldeb Strategol yn rheolaidd.
Dyma Amcanion Cydraddoldeb ar gyfer 2024-2028:
- Byddwn ni'n ymgorffori cydraddoldeb, amrywiaeth a chynhwysiant (EDI) ym mhob agwedd o ddarpariaeth ein gwasanaethau.
- Byddwn ni'n denu ymgeiswyr sy'n cynrychioli amrywiaeth ein cymunedau, gan gyfoethogi ein gallu sefydliadol o ran bodloni ein hamcanion.
- Byddwn ni'n parchu, gwerthfawrogi a gwrando ar ein holl weithwyr drwy ymgorffori diwylliant cynhwysol.
Mae cynllun gweithredu wedi cael ei ddatblygu yn unol â Threfniadau Rheoli Cyflawniad y Cyngor. Bydd cynnydd yn cael ei fonitro yn yr un ffordd ac ar yr un adeg â chynlluniau cyflawni’r Cyngor.
Os hoffech chi ragor o wybodaeth am y Cynllun neu gopi o'r Cynllun mewn fformat neu iaith wahanol, cysylltwch â’r Garfan Amrywiaeth a Chynhwysiant ar 01443 444529 neu e-bostiwch cydraddoldeb@rctcbc.gov.uk