Trawsnewid RhCT – Buddsoddi yn heddiw a'r dyfodol

Ar adeg pan mae'n rhaglen gyfalaf flynyddol yn fwy ei maint nag erioed, mae sylw'n cael ei roi yn ein hymgyrch Trawsnewid RhCT i'r hyn rydyn ni'n buddsoddi ynddo a'r modd mae hyn yn rhoi budd i'n cymunedau nawr, a'r budd a ddaw yn ei sgil yn y dyfodol. Ar hyd y ffordd fe fyddwn ni hefyd yn cwrdd â rhai o'r bobl y bydd y buddsoddi yma'n eu helpu.

Mae cymaint o bethau da yn digwydd yn y Cyngor. Rydyn ni'n cynnal 650 gwasanaeth i gyd, ac mae nifer ohonyn nhw'n gweithredu bob dydd. Bron nad oes modd sylwi arnyn nhw gan eu bod nhw'n gweithio mor dda – diolch i'n staff sy'n gwneud gwaith arbennig. Ond wnawn ni fyth gymryd y gwaith yma sy'n mynd rhagddo o hyd, yn ganiataol.

Ynghyd â hyn, mae'r Cyngor yn parhau i ofalu bod cyllid cyfalaf ar gael i'w fuddsoddi mewn meysydd blaenoriaeth sydd o bwys mawr i'n trigolion. Mae'r meysydd yma'n amrywio o ffyrdd i drafnidiaeth i liniaru llifogydd, gofal preswyl, prosiectau adfywio mwy eu maint, cyfleusterau mewn ysgolion, meysydd chwarae, a'r hyn sydd ar gael o ran hamdden.

Mae'n rhaglen gyfalaf wedi cynyddu i bum gwaith ei gwerth o gymharu â'r sefyllfa 10 mlynedd yn ôl – roedd dros £200 miliwn ar gyfer 2025/26, ym mis Medi 2025. Dyw hyn ddim yn cynnwys £11.5 miliwn ychwanegol sydd wedi'i nodi ers hynny ar gyfer meysydd blaenoriaeth.

Mae gwybodaeth yn y tudalennau a ganlyn ynghylch y modd rydyn ni'n gwneud gwahaniaeth gwirioneddol yn ein cymunedau:

Y Priffyrdd, Trafnidiaeth a Phrosiectau Strategol

Mae ein rhaglen gyfalaf sy'n mynd rhagddi yn cwmpasu sawl maes buddsoddi, o osod wyneb newydd ar y ffyrdd i liniaru llifogydd, cynnal a chadw tomenni glo, strwythurau priffyrdd a pharciau, meysydd parcio, teithio llesol, a datblygu cynlluniau trafnidiaeth mawr ar gyfer y dyfodol.

Ysgolion

A ninnau wedi cyflawni sawl prosiect ysgol mawr yn ystod blwyddyn academaidd 2024/25, rydyn ni'n troi'n sylw nawr at y gyfran nesaf o brosiectau ar gyfer y blynyddoedd sydd i ddod. Mae'r rhain yn amrywio o ddarparu hyd yn oed rhagor o ysgolion newydd, i adeiladu estyniadau modern a gwella ardaloedd dysgu.

Ardaloedd Chwarae

Mae ein buddsoddiad sylweddol mewn ardaloedd chwarae awyr agored wedi parhau dros flynyddoedd lawer, gan helpu plant a'u teuluoedd i fwynhau gweithgarwch llesol yn yr awyr agored. Mae ein buddsoddiad wedi'i dargedu yn parhau i alluogi adnewyddu offer, a hefyd creu ardaloedd newydd a gwell megis Ardaloedd Gemau Amlddefnydd a meysydd 3G.

Hamdden

Yn sgil ein gwasanaeth Hamdden am Oes mae modd i drigolion gael mynediad at gyfleusterau hamdden o ansawdd uchel, hygyrch, i'w helpu i wella eu ffitrwydd a'u llesiant. Rydyn ni wedi buddsoddi'n sylweddol yn ein canolfannau hamdden dros y blynyddoedd diwethaf, ac rydyn ni'n parhau i gyflwyno prosiectau newydd ar gyfer y dyfodol.

Gofal Preswyl ac Ychwanegol

Rydyn ni'n parhau â'n hymrwymiad o ran buddsoddi mewn cyfleusterau gofal o'r radd flaenaf, modern, ar gyfer pobl hŷn. Mae ein rhaglen yn ymatebol i'r hyn sy'n cael ei adrodd o ran newidiadau'n ymwneud ag anghenion a disgwyliadau pobl hŷn, ac yn ei sgil, mae rhagor o ddewis o ran y gofal preswyl sydd ar gael.

Adfywio

Mae ein gwaith yn y maes yma'n amrywio o gyflawni prosiectau buddsoddi mawr sydd wrth galon ein cymunedau, i ddatblygu strategaethau y cytunwyd arnyn nhw a fydd yn llywio buddsoddi sy'n digwydd yn y dyfodol mewn Canol Trefi, a helpu busnesau preifat i gael gafael ar gyllid allanol ar gyfer prosiectau lleol.