Cafodd yr ysgol newydd o'r radd flaenaf hon yng Nghwm Clydach ei hagor i ddisgyblion a staff yn nhymor yr hydref 2026. Dyma bumed Ysgol Anghenion Dysgu Ychwanegol Rhondda Cynon Taf.
Mae'r buddsoddiad gwych yma, sydd wedi'i leoli ar safle hen bencadlys y Cyngor, yn ymateb i gynnydd yn nifer y disgyblion ag ADY a chymhlethdod cynyddol anghenion y disgyblion. Mae'r prosiect wedi'i ddarparu ar y cyd â Llywodraeth Cymru, yn rhan o'i Raglen Cymunedau Dysgu Cynaliadwy.
Cafodd y safle ei ddymchwel yn 2024, a chafodd caniatâd cynllunio ei roi ym mis Mawrth 2025. Cafodd Morgan Sindall ei benodi'n gontractwr i gyflawni'r cam adeiladu ar ran y Cyngor.
Mae gan yr adeilad modern o'r radd flaenaf 23 o ystafelloedd dosbarth yn ogystal â mannau ategol, gan gynnwys pwll hydrotherapi, ystafell drampolîn, canolfan les, balconi diogel, a llawer o fannau chwarae a dysgu awyr agored. Mae'r prosiect wedi cynnwys uwchraddio’r cae chwaraeon 4G ar safle'r maes chwaraeon cyfagos. Caiff y safle yma ei reoli gan Ymddiriedolaeth Pentref Cambrian.
Dathlu agor Ysgol Cambrian i staff a disgyblion heddiw (Tachwedd 2026)
Mae mynediad presennol y safle o'r ffordd ddienw oddi ar Ystad Ddiwydiannol Parc Hen Lofa'r Cambrian yn parhau i gael ei ddefnyddio, gyda maes parcio â 79 o leoedd (ynghyd â mannau gwefru cerbydau trydan) wedi'i gynnwys o fewn ffin y prif safle. Mae'r cyfleusterau parcio ar gael at ddefnydd y gymuned y tu hwnt i oriau'r ysgol.
Mae Ysgol Cambrian yn rhoi cymorth i ddisgyblion ag anhwylder y sbectrwm awtistig, anawsterau dysgu difrifol, anawsterau dysgu dwys a lluosog, anawsterau cymdeithasol, emosiynol ac ymddygiadol, ac amhariad ar y synhwyrau.