Tudalen Ymweliadau Ysgolion

 Dysgu cyn, yn ystod ac ar ôl eich ymweliad
Mae ymweliad â Pharc Treftadaeth Cwm Rhondda wedi'i gynllunio i gynnig taith ddysgu gyflawn, gan gefnogi disgyblion cyn iddyn nhw gyrraedd, yn ystod yr ymweliad, ac yn yr ystafell ddosbarth wedi hynny.

Cyn eich ymweliad
Unwaith y byddwch chi wedi trefnu eich ymweliad, bydd ysgolion yn derbyn adnodd dysgu Map o’r Pwll Glo i'w ddefnyddio yn y dosbarth. Mae’r map yma’n cyflwyno geirfa, cysyniadau a chwestiynau allweddol, gan helpu disgyblion i ddeall beth yw pwll glo a'u paratoi ar gyfer eu taith danddaearol. Bydd hyn yn sicrhau bod y disgyblion yn hyderus, yn chwilfrydig ac yn barod i ddysgu wrth gyrraedd.

Yn ystod eich ymweliad
Ar y diwrnod, bydd disgyblion yn cymryd rhan mewn Diwrnod Dysgu wedi'i hwyluso'n llawn. Bydd hyn yn cynnwys:

• Teithiau Aur Du - taith danddaearol dan arweiniad cyn-löwr
• Dau weithdy rhyngweithiol sy'n cysylltu â'r cwricwlwm, ac sy’n cyd-fynd â'r Diwrnod Dysgu sy'n cael ei ddewis
• Archwiliad dan arweiniad o'r arddangosfeydd ffisegol a digidol

Mae'r dysgu wedi'i strwythuro drwy gydol y dydd, gan gyfuno cyffro ag ymchwilio, trafod a myfyrio. Dim ond eich grŵp chi fydd â mynediad i Dŷ’r Wyntyll, lle bydd modd i chi gael eich cinio a chadw’ch bagiau a'ch cotiau yn ddiogel.

Ar ôl eich ymweliad - mae'r dysgu'n parhau
Ar ddiwedd yr ymweliad, bydd gan ysgolion gyfle i fenthyg blwch benthyg sy'n llawn arteffactau a gweithgareddau ar gyfer yr ystafell ddosbarth. Bydd hyn yn eich caniatáu chi i barhau â’r dysgu yn yr ysgol, gan helpu disgyblion i atgyfnerthu ac ymestyn y profiad dysgu. Rydyn ni'n cynnig 8 blwch benthyg gwahanol sy'n mynd i’r afael â phob pwnc o'r GIG a'r Titanic i Ddyfeiswyr ac Ynni'r Dyfodol.

Taith yr Aur Du
Mae Taith yr Aur Du wrth galon pob Diwrnod Dysgu. Dyma daith drwy bwll glo go iawn dan arweiniad cyn-löwr sydd â phrofiad uniongyrchol o weithio yn y diwydiant glo.

Bydd disgyblion yn archwilio twneli tanddaearol go iawn ac yn clywed straeon go iawn am fywyd a gwaith o dan y ddaear, gan eu helpu i gysylltu’r hyn y maen nhw wedi’i ddysgu yn yr ystafell ddosbarth â phobl go iawn a lleoedd go iawn.

Yn rhan o'r profiad, bydd disgyblion hefyd yn mwynhau profiad Dram, sy'n ychwanegu cyffro ac yn eu helpu i ddychmygu sut beth oedd bywyd dan y ddaear.

Arddangosfeydd Rhyngweithiol, Digidol a Ffisegol
Mae’r dysgu'n parhau y tu hwnt i'r pwll glo trwy ymweld â’r canlynol yng nghwmni tywysydd:

• Arddangosfeydd rhyngweithiol newydd sbon a modelau dysgu (o fis Ebrill 2026), yn ogystal ag adnoddau dan arweiniad sydd wedi’u paratoi gan ein carfan addysg.
• Arddangosfa ddigidol sy'n cael ei defnyddio er mwyn cynnal gweithgareddau ymholi strwythuredig, wedi'i dylunio a'i pharatoi gan ein carfan addysg
• Arddangosfa arteffactau ffisegol sy’n cynnwys gwrthrychau go iawn sy'n gysylltiedig â bywyd a chymuned y pyllau glo

Arddangosfeydd dan arweiniad yw’r arddangosfeydd yma . Maen nhw'n amgylcheddau dysgu gweithredol sy'n cael eu teilwra gan ein carfan addysg i ehangu dealltwriaeth.

Cipolwg ar Ddiwrnod Dysgu Nodweddiadol
Mae ymweliadau ysgol wedi'u strwythuro'n ofalus i sicrhau bod disgyblion yn parhau i ymgysylltu drwy gydol y dydd, gydag amser wedi'i gynnwys ar gyfer egwyliau, cinio a symud o le i le. Mae pob gweithgaredd yn cael ei hwyluso'n llawn gan ein carfan addysg.

Amser cyrraedd
9–10am: Ysgolion yn cyrraedd, croeso a chofrestru
Bydd disgyblion yn cael eu rhannu’n grwpiau o hyd at 25
Byddwn ni'n darparu amserlen glir i athrawon ar gyfer y diwrnod

Yn ystod y dydd, bydd disgyblion yn ymweld â’r canlynol yn eu grwpiau:
Taith yr Aur Du
Dau weithdy rhyngweithiol, sy'n gysylltiedig â'r cwricwlwm
Archwiliad dan arweiniad o'r arddangosfeydd digidol a ffisegol
Mae amser egwyl ac amser cinio wedi'u cynnwys yn yr amserlen ac yn cael eu rheoli gan staff.

Gadael
Tua 2.15pm: Ysgolion yn gadael y safle, gan sicrhau digon o amser i ddychwelyd i'r ysgol ar gyfer diwedd y dydd. Bydd pob grŵp yn cael cyfle i gyflawni pob gweithgaredd sydd wedi’i drefnu; rydyn ni'n rheoli'r daith fel bod modd i athrawon ganolbwyntio ar gefnogi eu disgyblion.

Dewis eich Profiad
Rydyn ni’n ystyried y Cwricwlwm i Gymru wrth gynllunio’n Diwrnodau Dysgu, ac maen nhw wedi'u strwythuro i fod yn briodol i oedran y disgyblion, yn flaengar ac yn bwrpasol. Mae Diwrnodau Dysgu wedi'u gwahaniaethu'n ofalus i gefnogi ystod eang o alluoedd ac anghenion dysgu. A ninnau'n bartner dysgu hyblyg, rydyn ni'n hapus i drafod addasiadau lle bo modd er mwyn sicrhau bod eich ymweliad yn cefnogi’r hyn rydych chi’n canolbwyntio arno o ran y cwricwlwm

Diwrnod Dysgu 1: Glowyr Bach - Bywyd, Gwaith a Chwarae
Y dosbarth meithrin - Derbyn / Cam Cynnydd 1
Cysylltiadau â’r Cwricwlwm: Cyflwyniad ysgafn, diddorol i fywyd yn y gorffennol.
Bydd disgyblion yn:
Mwynhau ymweliad tanddaearol byr, wedi'i gefnogi'n ofalus
Archwilio bywyd bob dydd drwy weithdy diwrnod golchi Mrs Washy
Chwarae gyda theganau Fictoraidd a chymharu'r gorffennol a'r presennol
Archwilio’r arddangosfeydd rydych chi wedi’u dewis drwy weithgareddau yng nghwmni tywysydd
Profiad Dram

Diwrnod Dysgu 2: Bywyd Dan y Ddaear
Blwyddyn 2 – Blwyddyn 3 | Camau Cynnydd 1–2
Cysylltiadau â’r Cwricwlwm: Cyflwyniad i lo, mwyngloddio a bywyd tanddaearol.

Bydd disgyblion yn:
Archwilio'r pwll glo yng nghwmni cyn-löwr
Darganfod beth yw glo, sut mae'n cael ei ffurfio a pham ei fod yn bwysig
Cymryd rhan mewn dau o’r gweithdai canlynol:

Newidiadau o ran Plentyndod – Bydd disgyblion yn archwilio sut beth oedd bywyd i blant a wnaeth tyfu i fyny mewn cymunedau glofaol ac yn cymharu plentyndod, addysg ac arferion beunyddiol Fictoraidd â'u profiadau eu hunain heddiw.
Dwndwr Twneli – Bydd disgyblion yn ymchwilio i sut mae sain yn teithio o dan y ddaear a pham roedd cyfathrebu clir yn hanfodol er mwyn sicrhau diogelwch, cydweithio a goroesi yn y pyllau glo.
Creigiau sy'n pweru'r byd – Bydd disgyblion yn dysgu sut mae glo yn cael ei ffurfio dros filiynau o flynyddoedd ac yn archwilio pam y daeth yn ffactor mor bwerus ym myd diwydiant a bywyd bob dydd.rchwilio arddangosfeydd gan ddefnyddio adnoddau dan arweiniad sydd wedi'u paratoi gan ein carfan addysg profiad Dram. 

Diwrnod Dysgu 3: Gwaith, Perygl a Diogelwch
Blwyddyn 4 - Blwyddyn 6 | Camau Cynnydd 2-3
Cysylltiadau â’r Cwricwlwm: Archwilio perygl, iechyd a diogelwch yn y pyllau glo
Bydd disgyblion yn:

Ymchwilio i beryglon ac amodau gwaith dan y ddaear
Defnyddio tystiolaeth i ddeall sut mae gwyddoniaeth wedi gwella diogelwch
Cymryd rhan mewn dau o’r gweithdai canlynol:

• • Ysgyfaint Du - Bydd disgyblion yn trin a thrafod effaith llwch glo ar iechyd glowyr ac yn defnyddio tystiolaeth wyddonol i ddeall clefyd yr ysgyfaint, salwch hirdymor a chyfrifoldeb y gweithle.
  • Llwch a Pherygl – Bydd disgyblion yn archwilio peryglon llwch glo, ffrwydradau a damweiniau, ac yn dysgu sut helpodd dealltwriaeth wyddonol i leihau risg.
  • Dwndwr Twneli – Bydd disgyblion yn datblygu eu dealltwriaeth o sain a chyfathrebu trwy archwilio pwysigrwydd arwyddion a chydweithio o ran sicrhau diogelwch dan y ddaear.
• archwilio arddangosfeydd trwy weithgareddau rhyngweithiol dan arweiniad
• profiad Dram 

Diwrnod Dysgu 4: Glo, Ynni a Newid
Blwyddyn 5 – Blwyddyn 7 | Cam Cynnydd 3
Cysylltiadau â’r Cwricwlwm: Cysylltu mwyngloddio glo ag ynni, diwydiant a newid amgylcheddol.
Bydd disgyblion yn:

• archwilio glo fel ffynhonnell ynni a'i effaith ar gymdeithas
• cymharu defnydd ynni yn y gorffennol a'r presennol
• cymryd rhan mewn dau o’r gweithdai canlynol:
  • Ymdrin ag Ynni – Bydd disgyblion yn ymchwilio i sut y cafodd glo ei ddefnyddio i bweru'r Chwyldro Diwydiannol ac yn ei gymharu â ffynonellau ynni modern ac adnewyddadwy.
  • Peiriannau Pwerus – Bydd disgyblion yn archwilio peiriannau a grymoedd syml i ddeall sut mae technoleg ym myd mwyngloddio wedi cynyddu cynhyrchiant a lleihau llafur corfforol.
  • Creigiau sy'n pweru’r byd (lefel uwch) – Bydd disgyblion yn ehangu eu dealltwriaeth o sut mae glo yn ffurfio drwy gysylltu prosesau daearegol â systemau ynni a newid amgylcheddol.
• archwilio arddangosfeydd gan ddefnyddio adnoddau dan arweiniad sydd wedi'u paratoi gan ein carfan addysg
• profiad Dram 

Diwrnod Dysgu 5: Pŵer, Iechyd ac Anghydraddoldeb
Blwyddyn 7 – Blwyddyn 9 | Cam Cynnydd 3
Cysylltiadau â’r Cwricwlwm: Annog dadansoddi, trafodaeth a meddwl yn feirniadol.

Bydd disgyblion yn:
Archwilio sut y llywiodd pŵer, cynhyrchiant a risg fywydau gwaith
Archwilio cyfrifoldebau, rheoleiddio ac anghydraddoldeb
Cymryd rhan mewn dau o’r gweithdai canlynol:

• Ysgyfaint Du (lefel uwch) – Bydd disgyblion yn dadansoddi effeithiau hirdymor mwyngloddio ar iechyd ac yn trafod tystiolaeth sy'n ymwneud â rheoleiddio, cyfrifoldeb a hawliau gweithwyr.
• Llwch a Pherygl (lefel uwch) – Bydd disgyblion yn archwilio peryglon diwydiannol trwy ddamweiniau, deddfwriaeth acagweddau newidiol tuag at ddiogelu gweithwyr.
• Peiriannau Pwerus (lefel uwch) – Bydd disgyblion yn archwilio sut y gwnaeth mecaneiddio newid pŵer, cynhyrchiant ac anghydraddoldeb yn y diwydiant mwyngloddio.
• dadansoddi tystiolaeth drwy weithgareddau arddangos dan arweiniad
• profiad Dram

Cost Ymweliad Ysgol
Ein nod yw sicrhau bod ymweliadau ysgol â Pharc Treftadaeth Cwm Rhondda yn cynnig profiad o safon uchel ac sy’n cynnig gwerth am arian. Rydyn ni’n cynnig diwrnod cyfan o ddysgu wedi'i arwain gan y cwricwlwm mewn amgylchedd hanesyddol unigryw.
Mae cost yr ymweliad yn cynnwys:
taith dan y ddaear dan arweiniad cyn-lowyr
dau weithdy rhyngweithiol sy'n gysylltiedig â'r cwricwlwm
archwiliad dan arweiniad o'r arddangosfeydd ffisegol a digidol

• adnoddau dysgu cyn yr ymweliad, gan gynnwys Map o’r Pwll Glo i ddechrau’r dysgu yn yr ysgol
• cyfle i fenthyg blwch benthyg am ddim ar ôl eich ymweliad i barhau â’r dysgu yn ôl yn yr ystafell ddosbarth

Rydyn ni'n codi pris cychwynnol o £10 fesul disgybl ar gyfer yr ymweliadau yma, gydag 1 oedolyn yn cael mynediad am ddim fesul pob 10 disgybl. Rydyn ni'n codi £10 am bob oedolyn ychwanegol.

Ydych chi'n barod i drefnu'ch ymweliad?
Mae ein Diwrnodau Dysgu'n boblogaidd ac mae dyddiadau'n llenwi'n gyflym, yn enwedig yn ystod tymhorau'r Gwanwyn a'r Haf.

I gadw lle cwblhewch y ffurflen cadw lle sydd ynghlwm gan nodi'r dyddiadau sy'n gyfleus i chi a'i dychwelyd i ni. Byddwn ni'n cysylltu â chi i gadarnhau'ch ymweliad a thrafod unrhyw fanylion pellach.

Os oes gyda chi unrhyw gwestiynau neu os hoffech chi drafod pa Ddiwrnod Dysgu fyddai orau ar gyfer eich disgyblion, mae croeso i chi gysylltu â'n carfan addysg trwy ffonio 01443 682036 neu e-bostio DerbynfaParcTreftadaeth@rctcbc.gov.uk.

Mae modd i ni hefyd gynnig gostyngiad ar deithiau bws a byddwn ni'n gweithio gyda chi i sicrhau bod eich ymweliad â Pharc Treftadaeth Rhondda yn brofiad cadarnhaol, sydd wedi'i drefnu'n dda ac sy’n cynnig diwrnod cofiadwy i'ch disgyblion.

Rydyn ni'n edrych ymlaen at groesawu eich disgyblion dan y ddaear — trefnwch ymweliad, a byddwn ni'n gofalu am y dysgu.
I gael gwybodaeth ychwanegol ynghylch ein darpariaeth addysg, e-bostiwch: gwasanaethtreftadaeth@rctcbc.gov.uk