Danielle Day Jones - Cynorthwy-ydd Cyllid dan Brentisiaeth

Beth oeddech chi'n ei wneud cyn dechrau'r brentisiaeth?

Cyn dechrau'r brentisiaeth yma roeddwn i'n gweithio'n llawn amser mewn ysgol feithrin. Roeddwn i'n mwynhau fy swydd yno ond doeddwn i ddim yn gallu dychmygu fy hun yn datblygu yn y rôl. Es i ar absenoldeb mamolaeth a chael merch fach, ac fe wnes i  gymryd blwyddyn i ffwrdd o fy swydd er mwyn treulio cymaint o amser gyda hi ag oedd yn bosib. Roeddwn i'n awyddus i ddatblygu fy ngyrfa, cael swydd roeddwn i'n ei mwynhau a swydd oedd yn golygu bod modd imi gael cydbwysedd rhwng fy ngwaith a fy nheulu. Roeddwn i'n gwybod bod prentisiaethau RhCT ar fin cael eu cyhoeddi ac roedd yn rhaid imi drio fy ngorau i ennill fy lle ar y rhaglen!

Pam cyflwynoch chi gais am le ar y cynllun?

Roeddwn i'n adnabod pobl oedd wedi dod o hyd i'w gyrfaoedd trwy raglen Brentisiaethau RhCT ac felly penderfynais i roi cynnig arni. Rydw i wastad wedi mwynhau dysgu wrth weithio, ac roeddwn i'n aml yn cyflawni cymwysterau a chyrsiau er mwyn gwella fy nealltwriaeth a’m gwybodaeth. Roedd meddwl am weithio wrth ddysgu yn apelio'n fawr imi ac rwy'n falch iawn fy mod i wedi manteisio ar y cyfle.

Pa gyfleoedd datblygu ydych chi wedi'u cael ers dechrau gweithio gyda Chyngor RhCT?

Ers dechrau fy mhrentisiaeth wyth mis yn ôl, rydw i wedi bod yn gweithio ar gwblhau cynhwyster Fframwaith Credydau a Chymwysterau (QCF) mewn Gweinyddu Busnes. Rydw i wedi dysgu cymaint yn barod trwy’r gwaith cwrs a thrwy fy ngoruchwylwyr, rheolwyr a chydweithwyr eraill. Rwy'n dysgu pethau newydd bob dydd.

Beth oedd yr uchafbwyntiau?

Rydw i wir wedi mwynhau fy mhrentisiaeth hyd yn hyn ac yn mwynhau cwblhau'r gwaith bob mis. Rwy'n gweithio o gartref weithiau ac mae'r swydd wedi golygu bod modd imi weithio'n hyblyg - mae hyn wedi bod yn fuddiol iawn i fy nheulu. Wrth imi ddatblygu a dysgu, rydw i wedi derbyn rhagor o gyfrifoldebau sy'n gwneud imi deimlo fy mod i ar y trywydd iawn.

Argymhellion i ymgeiswyr:

Byddwn i'n bendant yn argymell ymgeisio am brentisiaeth gyda Chyngor RhCT. Dyma'r penderfyniad gorau imi ei wneud erioed. Mae'n gyfle gwych - doeddwn i ddim yn credu byddai ffordd imi weithio'n llawn amser, cwblhau gwaith cwrs a magu plentyn ond rwy’ mor falch fy mod i wedi manteisio ar y cyfle. Rwy' wir yn mwynhau fy swydd ac yn edrych ymlaen at weld beth fydd yn digwydd dros y ddwy flynedd nesaf.