Ngwobrau Rhagoriaeth mewn Rheoli Pobl 2021

Mae Cyngor Rhondda Cynon Taf wedi cyrraedd rhestr fer yng Ngwobrau Rhagoriaeth mewn Rheoli Pobl 2021 i gydnabod ei waith dyddiol.

Bydd enillwyr Gwobrau Rhagoriaeth mewn Rheoli Pobl 2021 yn cael eu cyhoeddi yn ystod Cynhadledd Rithwir Cymdeithas Rheolwyr Pobl y Gwasanaethau Cyhoeddus ym mis Medi.

Mae'r Cyngor wedi cyrraedd rhestr fer categori'r Rhaglen Dalent Orau, a noddir gan Tribepad.

Meddai'r Cynghorydd Maureen Webber, Dirprwy Arweinydd Cyngor Rhondda Cynon Taf: “Rwy’n falch iawn bod y Cyngor yn cael cydnabyddiaeth am ei holl waith rhagorol yn y sector cyhoeddus a hoffwn longyfarch ein holl staff syn arwain y ffordd i sefydliadau eraill ledled y wlad.

“Rwy’n ymfalchïo’n fawr yn y ffaith bod ein Cyngor wedi cyrraedd rhestr fer Gwobrau Rhagoriaeth mewn Rheoli Pobl 2021 a Gwobrau 'Personnel Today' 2021, a hynny ar ôl cael llwyddiant mawr  yng Ngwobrau Prentisiaethau Cymru 2021.

“Mae recriwtio prentisiaid yn un o ymrwymiadau hirsefydlog y Cyngor i’r gymuned leol, gan ragori ar ein hymrwymiad ddwy flynedd yn gynnar i ddarparu 150 o swyddi i brentisiaid a graddedigion erbyn diwedd tymor y Cyngor.

“Os ydych chi am feithrin y sgiliau sydd eu hangen i foderneiddio a darparu gwasanaethau i drigolion yn y dyfodol, rhaid rhoi cyfleoedd i brentisiaid - dyma rywbeth roedd Cyngor RhCT yn effro iddo yn gynnar.”

Ers dros 40 mlynedd, mae Cymdeithas Rheoli Pobl y Gwasanaethau Cyhoeddus wedi bod yn llais cyfunol dros adran Adnoddau Dynol Sefydliad gwasanaethau cyhoeddus cymwys, angerddol, ymroddedig ac amrywiol. Mae'n chwarae rhan hanfodol wrth ddylanwadu ar bobl sy'n gwneud penderfyniadau a rhanddeiliaid allweddol sy'n ymwneud â rheoli pobl ac sy'n delio â materion y gweithlu.

Dywedodd llefarydd ar ran Cymdeithas Rheolwyr Pobl y Gwasanaethau Cyhoeddus: “Mae prinder sgiliau wedi cael ei nodi fel pryder gan bob rhan o’r sector cyhoeddus, yn ogystal ag ar y lefel uchaf o Lywodraeth. Mae ymadawiad y DU â'r UE yn golygu y bydd angen i sefydliadau nodi a datblygu eu talent yn fwy nag erioed o'r blaen er mwyn gwella symudedd mewnol a'u gallu.

“Mae gwobr y Rhaglen Dalent Orau yn cydnabod cyflogwyr sy'n ceisio mynd i'r afael â'r her yma, ac ag anghenion eu sefydliad ar hyn o bryd ac yn y dyfodol, trwy weithredu strategaethau rheoli talent moesegol sy'n addas i'r dyfodol ac sy'n seiliedig ar dystiolaeth.”

Mae Cyngor Rhondda Cynon Taf hefyd wedi cyrraedd rhestr fer categori Cyflogwr Prentisiaid y Flwyddyn yng Ngwobrau 'Personnel Today' 2021, i gydnabod llwyddiant ei Gynllun Prentisiaethau.