Cyfleuster gofal plant cyfrwng Cymraeg yn ardal Beddau yn mwynhau cyfleusterau newydd

Mae teuluoedd lleol bellach yn elwa ar ardal gofal plant fodern newydd sydd wedi cael ei chreu yn Ysgol Gynradd Gymraeg Castellau. Roedd hyn yn bosibl o ganlyniad i fuddsoddiad sylweddol mewn cyfleusterau newydd yn yr ysgol yn ardal Beddau.

O ganlyniad i'r buddsoddiad gwerth £1.5m wedi'i ariannu gan Lywodraeth Cymru, mae dwy ystafell ddosbarth yn yr ysgol cyfrwng Cymraeg wedi cael eu hailwampio er mwyn creu uned dosbarth meithrin a derbyn fodern sy'n addas ar gyfer yr 21^ain Ganrif. Hefyd, mae nifer o ardaloedd eraill yn yr ysgol wedi cael eu hailfodelu er mwyn adeiladu estyniad unllawr newydd. Yn ogystal â hyn, mae offer chwarae newydd sbon i'w gweld yn yr ardaloedd allanol sy'n bodoli eisoes.

Mae staff a disgyblion wedi bod yn mwynhau'r ardaloedd newydd yn Ysgol Gynradd Gymraeg Castellau ers mis Medi 2024, ac mae'r gwaith bellach wedi'i gwblhau. Mae modd gweld rhagor o wybodaeth am y prosiect yma.

Mae'r buddsoddiad, trwy Raglen Gyfalaf Gofal Plant a'r Blynyddoedd Cynnar, wedi galluogi Cylch Meithrin Beddau i weithredu cyfleuster gofal plant cyfrwng Cymraeg llawn amser yn yr ysgol – gan gynnwys gwasanaeth gofal plant cofleidiol bob prynhawn. Y bwriad o ran symud y gwasanaethau i un lleoliad ac ynddo ragor o le, yw annog y plant i deimlo’n rhan o'r ysgol erbyn y byddan nhw'n cyrraedd yr oedran statudol ar gyfer mynychu’r ysgol.

Meddai'r Cynghorydd Rhys Lewis, Aelod o Gabinet Cyngor Rhondda Cynon Taf ar faterion Addysg a'r Gymraeg: “Rydw i'n falch iawn bod pobl ifainc yn mwynhau'r cyfleusterau newydd yn Ysgol Gynradd Gymraeg Castellau, a bod y buddsoddiad yma gyda Llywodraeth Cymru wedi galluogi Cylch Meithrin Beddau i wneud ei ddarpariaeth bresennol yn llawn amser. Mae'r amgylchedd dysgu yn cynnwys cyfleusterau'r 21^ain Ganrif, gan fodloni safon uchel ein Rhaglen Moderneiddio Ysgolion – yn ogystal â'n hystod o brosiectau ar y cyd ar draws rhaglenni buddsoddi Llywodraeth Cymru, sy'n parhau ledled y Fwrdeistref Sirol.

“Mae creu lleoedd addysg cyfrwng Cymraeg ychwanegol, gan gynnwys cynyddu mynediad at Gylch Meithrin lleol a chreu rhagor o leoedd mewn dosbarthiadau meithrin cyfrwng Cymraeg, yn flaenoriaethau allweddol yn ein Cynllun Strategol Cymraeg mewn Addysg 10 mlynedd. Rydyn ni hefyd wedi buddsoddi mewn cyfleusterau addysg gwerth miliynau o bunnoedd ar draws grwpiau oedran cynradd ac uwchradd – gan gynnwys prosiectau allweddol i gynyddu nifer y lleoedd yn YGG Aberdâr ac Ysgol Rhydywaun yn 2022. Yn y cyfamser, agorodd YGG Awel Taf yn Rhydfelen ym mis Medi ac mae gwaith adeiladu safle ysgol newydd sbon ar gyfer YGG Llyn y Forwyn yn ardal Glynrhedynog bron â bod yn barod.

“Mae'r buddsoddiad diweddaraf yma ar gyfer cymuned Beddau wedi cynnwys nifer o ffynonellau ynni adnewyddadwy yn nyluniad yr estyniad newydd. Mae'r rhain yn cynnwys ynni'r haul a'r gwynt, yn ogystal â systemau casglu dŵr glaw – sy'n cydymffurfio â'n nodau a chyfrifoldebau mewn perthynas â'r newid yn yr hinsawdd. Mae'r cyfleusterau modern newydd i'w gweld yn wych ac rydw i'n falch bod y prosiect cyffrous yma wedi'i gyflawni yn unol â'r amserlen yn ystod y tymor presennol.”