Skip to main content

Y newyddion diweddaraf - Adeiladu unedau busnes modern yn Nhresalem

White modern houses next to road

Mae'r Cyngor wedi rhannu'r newyddion diweddaraf ynghylch adeiladu 20 uned fasnachol fodern yn Nhresalem. Mae modd i'r Cyngor gadarnhau'i fod eisoes wedi derbyn sawl ymholiad gan nifer o denantiaid posibl.

Mae'r unedau busnes, sy'n cael eu hadeiladu ar dir heb ei ddefnyddio oddi ar Stryd Wellington, yn cael eu cyflawni ar ôl i'r Cyngor sicrhau cyllid gwerth £3.36miliwn gan Gronfa Datblygu Rhanbarthol Ewrop drwy Lywodraeth Cymru. Cafodd y safle ei glirio yn gynnar yn 2020, er mwyn i'r contractwr, R&M Williams ddechrau'r cam adeiladu yn hwyrach yn y flwyddyn.

Mae'r cyfnod adeiladu yn parhau i wneud cynnydd amlwg - mae modd i drigolion ac ymwelwyr weld y cynnydd sydd wedi'i wneud ar yr adeiladau ar y safle datblygu. Mae'r gwaith dur strwythurol wedi'i gwblhau ac mae gwaith gosod y llawr wedi'i gwblhau.

Mae'r rhan fwyaf o'r gwaith to hefyd wedi'i gwblhau. Mae gwaith adeiladu'r waliau allanol a mewnol eisoes wedi dechrau  Mae gwaith cladin hefyd wedi cychwyn ar sawl adeilad yn ddiweddar.

Dywedodd y Cynghorydd Robert Bevan, Aelod o Gabinet Cyngor Rhondda Cynon Taf ar faterion Menter, Datblygu, a Thai: “Rwy’n falch bod gwaith datblygu'r unedau modern yn Nhresalem yn parhau i wneud cynnydd, wrth i'r Cyngor gyflawni twf economaidd cynaliadwy a swyddi newydd yn lleol - gan sicrhau bod safle cyflogaeth allweddol yn cael ei ddefnyddio, fel sydd wedi'i amlinellu yn y Cynllun Datblygu Lleol.

“Mae'r diweddariad yma'n dilyn y cyhoeddiad diweddar a oedd yn nodi bod y Cyngor wedi sicrhau tenant ar gyfer ei uned busnes newydd sbon ym Mharc Coed-Elái yn ardal Coed-Elái. Cafodd yr adeilad ei gwblhau ym mis Ionawr 2021. Dyma adeilad sydd wedi elwa o gyllid sylweddol gwerth £2.58miliwn gan Gronfa Datblygu Rhanbarthol Ewrop, gyda'r Cyngor yn arwain ar gynllun cyd-fenter gyda Llywodraeth Cymru ar gyfer y prosiect hwnnw.

“Mae hefyd yn newyddion cadarnhaol iawn bod y Cyngor wedi clywed gan nifer o ddarpar denantiaid sydd wedi mynegi diddordeb yn yr unedau yn Nhresalem, gan bwysleisio i ni fod galw am unedau busnes yn lleol. Mae'r datblygiad yma'n cynnwys 20 uned, a byddai modd i'r Cyngor gynnig lle i un tenant neu sawl tenant ar y safle - gan ddibynnu ar y galw.

“Bydd y Cyngor yn darparu diweddariad pellach ar y datblygiad yn Nhresalem wrth i gamau gwaith pellach gael eu cwblhau ar y safle. Hoffwn ddiolch i drigolion lleol am eu cydweithrediad parhaus wrth i'r datblygiad symud tuag at y camau nesaf. "

Dylid anfon pob ymholiad ynglŷn â'r unedau at JLL, sef yr asiant sydd wedi'i benodi gan y Cyngor, drwy ffonio 029 2022 7666 neu e-bostio Kate.Openshaw@eu.jll.com.

Wedi ei bostio ar 19/08/2021