Gwaith yn y cwrs dŵr oddi ar Deras Campbell yn Aberpennar

Bydd y Cyngor yn dechrau ar waith i’r cwrs dŵr arferol oddi ar Deras Campbell yn Aberpennar – y bwriad yw adlinio rhannau o’r sianel a darparu amddiffyniad i’r waliau yn y lleoliad yma, yn dilyn difrod ar draws sawl storm.

Bydd y cynllun yn dechrau ddydd Llun, 14 Mawrth, a bydd yn para tua phedair wythnos. Mae'r Cyngor wedi penodi Contractwyr Peirianneg Forol a Sifil EDS i wneud y gwaith. Mae'r rhan o'r cwrs dŵr yn gorwedd gerllaw Teras Campbell, rhwng Stryd Austin a Stryd Allen, gyda dŵr yn llifo trwy gyfres o sianeli agored a darnau â chwlfert, ac yna i'r Afon Cynon.

Mae stormydd dros nifer o flynyddoedd wedi difrodi’r waliau ar ddwy ochr y cwrs dŵr. Bydd y gwaith sydd ar y gweill yn adlinio’r sianel yn y lleoliad yma, ac yn darparu amddiffynfeydd concrit i’r waliau presennol. Mae’n cael ei gynnal gyda chyfraniad o 85% gan Grant Gwaith Graddfa Fach Llywodraeth Cymru, gyda’r Cyngor yn darparu’r 15% sy’n weddill o’r cyllid.

Bydd y rhan fwyaf o’r gwaith yma'n digwydd yn y cwrs dŵr, ac nid yw contractwr y Cyngor yn rhagweld y bydd yn tarfu rhyw lawer ar drigolion. Serch hynny, bydd angen cau rhai ffyrdd lleol drwy gydol yr amser, a bydd angen rhoi trefniadau rheoli traffig ar waith i reoli mynediad cerddwyr a cherbydau i garejys.

Bydd yr oriau gwaith rhwng 8am a 5pm o ddydd Llun i ddydd Gwener, a bydd y contractwr yn ceisio lleihau sŵn ac anghyfleustra. Bydd y contractwr yn ysgrifennu at drigolion cyn i'r cynllun ddechrau i egluro'r gwaith a darparu manylion cyswllt y safle.

Meddai'r Cynghorydd Andrew Morgan, Arweinydd Cyngor Rhondda Cynon Taf ac Aelod o'r Cabinet sy'n gyfrifol am y Priffyrdd a Thrafnidiaeth: “Bydd y gwaith pwysig hwn i ddiogelu sianel y cwrs dŵr arferol ger Campbell Terrace ar gyfer y dyfodol yn dechrau ddydd Llun. Bydd hyn yn cwblhau’r gwaith o adlinio rhannau o’r sianel, ac i ailadeiladu rhannau o’r waliau bob ochr i’r cwrs dŵr. Bydd angen i'r contractwr gau ffyrdd yn lleol, ond does dim disgwyl bydd fawr o darfu ar y gymuned yn gyffredinol.

“Cafodd yr ardal hon o Aberpennar ei tharo’n arbennig o galed gan Storm Dennis, ac mae cynllun Teras Campbell yn rhan o strategaeth ehangach i atgyweirio a diogelu’r rhwydwaith cyrsiau dŵr lleol ar gyfer y dyfodol. Bydd yn cydredeg â gwaith sy'n mynd rhagddo i gyflawni atgyweiriadau adferol yn y cwrs dŵr rhwng Stryd Allen a Stryd Copley. Mae gwaith yno'n parhau i fynd rhagddo ar ôl dechrau ym mis Ionawr.

“Hoffwn ddiolch i’r gymuned leol am ei chydweithrediad parhaus wrth i’r cynllun atgyweirio diweddaraf gael ei gyflawni gyda chymorth Llywodraeth Cymru.”