Sioe Ceir Clasur

Mae'r Sioe Ceir Clasur yn dychwelyd unwaith eto eleni i Daith Pyllau Glo Cymru!

Dyma achlysur gwych i'r teulu cyfan ei fwynhau, gyda chyfle i weld ceir clasur mewn cyflwr arbennig a chwrdd â'u perchnogion brwdfrydig a gwybodus. Mae'r cyfan yn digwydd ddydd Sadwrn, 24 Mehefin, rhwng 10am a 4pm.

Yn ôl yr arfer, bydd yr achlysur yn cael ei gynnal ar y cyd â Chlwb Ceir Clasur Morgannwg. Pris mynediad yw £3 y pen.

Meddai'r Cynghorydd Ann Crimmings, Aelod o Gabinet Cyngor Rhondda Cynon Taf ar faterion yr Amgylchedd a Hamdden: “Mae croeso bob amser i’r Sioe Ceir Clasur yn Nhaith Pyllau Glo Cymru. Mae'r ceir sy'n cael eu harddangos bob tro fel pin mewn papur ac yn rhoi cipolwg i ni ar fywyd y dyddiau a fu. Dyma'r atyniad hanes fyw perffaith gyda'i arddangosfeydd a’i daith danddaearol boblogaidd.

“Mae bob amser yn wych cwrdd ag aelodau’r clwb ceir a chlywed straeon am eu ceir annwyl a’r gwaith sy’n mynd i mewn i ofalu amdanyn nhw! Mae hefyd yn gyfle i ddangos moduron clasurol a modelau unigryw i’r plantos bach, gan eu bod nhw ddim i'w gweld ar ein ffyrdd ni mwyach.

“Hefyd, gyda chymaint o bethau eraill i'w gweld a'u gwneud ar y safle, mae’n ddiwrnod allan gwych i’r teulu cyfan.”

Os ydych chi'n dod draw i'r Sioe Ceir Clasur eleni, cofiwch fod modd i chi hefyd ymweld â'n harddangosfeydd rhyngweithiol am ddim, mwynhau pryd o fwyd, byrbryd neu de prynhawn yn Caffe Bracchi, a tharo heibio i'r siop anrhegion i bori'r casgliad o gofroddion, anrhegion clasurol Cymreig neu gynnyrch lleol. Efallai byddwch chi'n gweld ambell beth i ychwanegu at eich casgliad!

Rydyn ni hefyd yn falch iawn o gyhoeddi y bydd ein crefftwyr preswyl, Craft of Hearts, yn cynnal ffair grefftau a gweithdai crefft ar y llawr cyntaf.

Mae croeso i ymwelwyr fwynhau taith yr Aur Du hefyd, lle bydd cyn-löwr yn rhoi helmed glöwr ar eu pennau ac yn eu cludo o dan y ddaear ac yn ôl mewn amser.

Mae pob un o’n tywyswyr yn gyn-löwr a bydd yn rhannu ei straeon personol a’i atgofion gyda chi. Beth am fynd ar DRAM!? Daliwch yn dynn wrth i chi ddynwared taith olaf glo dram i ben siafft y pwll yn y profiad cyffrous yma!!

Mae tocynnau ar gyfer y Sioe Ceir Clasur ar gael yma. Bydd tocynnau ar gael ar y diwrnod hefyd.

Dysgwch ragor am Daith Pyllau Glo Cymru, cadwch le ar Daith Dywys Danddaearol yr Aur Du neu hyd yn oed cadwch fwrdd yn Caffe Bracchi.