Bydd cynllun i drwsio'r ffordd gerbydau ar y B4273 rhwng Glyncoch ac Ynysybwl yn dechrau wythnos nesaf. Bydd dim angen y goleuadau traffig dros dro ar ôl i'r gwaith gael ei gwblhau.
Yn dilyn adroddiad o holltau yn y ffordd gerbydau, cafodd y goleuadau dros dro eu gosod fel mesur diogelwch i leihau'r llwyth ar wal yr afon gyfagos.
Mae’r mater wedi cael ei ymchwilio ers hynny ac mae cynllun i ddatrys y broblem. Bydd y gwaith yn dechrau ddydd Llun 8 Ebrill ac yn para naw wythnos.
Bydd gwaith dros dro yn cael ei wneud i ddechrau a fydd yn caniatáu i draffig deithio i'r ddau gyfeiriad drwy gydol y cynllun. Bydd mynediad yn cael ei gynnal i gerddwyr hefyd.
Yna bydd y prif brosiect yn gosod trawst ymyl concrit wedi'i gastio ymlaen llaw i gynnal y ffordd gerbydau, a fydd yn cael ei ddiogelu trwy osod ebillion i mewn i'r graig.
Tua diwedd y cynllun, bydd yr holl ddraenio, cyrbiau, marciau ffordd, arwyddion, leinin ac ymylon priffyrdd yn cael eu hadfer.
Bydd y gwaith ail-wynebu terfynol i'r ffordd gerbydau hefyd yn cael ei gynnal. Bydd angen cau'r ffordd – bydd rhagor o wybodaeth am hyn yn nes at yr amser.
Mae’r Cyngor wedi penodi Alun Griffiths Ltd fel y contractwr i gyflawni’r cynllun. Ariennir y gwaith drwy raglen Llywodraeth Cymru ar gyfer gwaith yn dilyn Storm Dennis.
Diolch i ddefnyddwyr y ffyrdd ymlaen llaw am eich cydweithrediad yn ystod y cynllun yma a fydd yn trwsio'r difrod yn y lleoliad.
Wedi ei bostio ar 05/04/24