Dyma roi gwybod i drigolion y bydd cyfres o waith yn cael ei wneud yn Nheras Clydach yn Ynysybwl yn fuan, a fydd angen cynllun rheoli traffig er mwyn sicrhau diogelwch.
Bydd y cynllun yn cynnwys adeiladu rhan ychwanegol o wal ar hyd y llwybr troed uchel, ymgymryd â gwaith i gynyddu uchder yr arglawdd uwchben y briffordd, a chynnal atgyweiriadau unigol i wal y briffordd.
Mae'r contractwyr Hammond ECS Ltd a Calibre Contracting Ltd wedi'u penodi i gyflawni'r ystod o waith ar ran y Cyngor.
Mae disgwyl y bydd y cynllun yn para tua phum wythnos i gyd, gan ddechrau o ddydd Mercher, 23 Gorffennaf.
Bydd goleuadau traffig dwyffordd dros dro ar waith ar hyd Teras Clydach yn ystod oriau dydd, gan ddychwelyd i hyd byrrach dros nos – a bydd mesurau ar waith hefyd i reoli mynediad i gerddwyr. Mae'n debygol y bydd argaeledd parcio ar y stryd hefyd yn cael ei effeithio yn ystod cyfnod y gwaith.
Mae trigolion sy'n byw ger lleoliad y gwaith wedi derbyn llythyr gan y Cyngor i esbonio'r cynllun a'r trefniadau yn fanylach.
Bydd y Cyngor yn gweithio'n agos gyda'r contractwyr y mae wedi'u penodi i leihau aflonyddwch i drigolion.
Diolch ymlaen llaw i'r gymuned am eich cydweithrediad.
Wedi ei bostio ar 21/07/2025