Cymerwch y cam cyntaf yn Ffair Swyddi Cyngor RhCT a Phartneriaid!

Cymerwch y cam cyntaf tuag at yrfa newydd yn Ffair Swyddi Cyngor RhCT a Phartneriaid 2026. Mae'r achlysur am ddim yma'n cael ei gynnal ddydd Iau 26 Chwefror yn Llyfrgell Pontypridd, Llys Cadwyn, CF37 4TH, rhwng 10am a 2pm, gydag awr dawel ar gael o 9am tan 10am.

Bydd y ffair swyddi yn dod ag ystod eang o gyflogwyr sy'n recriwtio ynghyd, gan roi'r cyfle i chi siarad yn uniongyrchol â sefydliadau, dysgu am swyddi gwag cyfredol a dechrau'r broses ymgeisio ar y diwrnod. Byddwch hefyd yn gallu cymryd rhan mewn gweithdai sydd wedi'u cynllunio i'ch paratoi ar gyfer cyfweliadau ac ysgrifennu CV.

Bydd dros 50 o sefydliadau yn bresennol ar y diwrnod, gyda swyddi ar gael ar draws amrywiaeth o sectorau ac yn addas ar gyfer pobl o bob oed a phrofiad. Bydd rheolwyr gwasanaethau a gweithwyr Cyngor RhCT yn bresennol i roi gwybodaeth ac arweiniad yn ymwneud â gyrfaoedd yn y Cyngor.

P'un a ydych chi'n chwilio am eich swydd gyntaf, yn ystyried newid gyrfa, neu’n awyddus i gael rhywfaint o ysbrydoliaeth, mae rhywbeth at ddant pawb yn Ffair Swyddi Cyngor RhCT a Phartneriaid.

Meddai'r Cynghorydd Maureen Webber, Dirprwy Arweinydd Cyngor Rhondda Cynon Taf: “Rydyn ni'n falch o gyhoeddi ein ffair swyddi gyntaf yn 2026. Mae'r achlysur yma'n dod â phobl leol a chyflogwyr ynghyd mewn un lle bywiog, gan roi cyfle i'r rhai sy'n chwilio am waith drin a thrafod llwybrau gyrfa newydd wrth helpu busnesau i gysylltu â'r gymuned a chryfhau eu gweithlu.

“Fel Cyngor, rydyn ni wedi ymrwymo i gefnogi ein trigolion i gael mynediad at gyflogaeth o safon, ac mae’r achlysur yma'n enghraifft wych o sut mae modd creu cyfleoedd, cefnogi twf a chreu economi leol gryfach trwy weithio gyda’n gilydd.”

Mae modd gweld rhestr o gyflogwyr sydd wedi cadarnhau y byddan nhw’n cymryd rhan isod:

**Nodwch, mae'n bosibl bydd arddangoswyr gwahanol yno ar y diwrnod