Cyngor yn ystod Storm Darragh – y diweddaraf ddydd Gwener

Mae'r Swyddfa Dywydd wedi cyhoeddi rhybuddion tywydd i'r cyhoedd yn Rhondda Cynon Taf. Darllenwch yr holl wybodaeth am Storm Darragh yn ofalus.

Mae disgwyl i'r glaw ddechrau ganol prynhawn a dwysáu. Mae'r rhagolygon yn awgrymu y bydd rhagor o law parhaus yn cyrraedd tua 3am gyda llawer o law yn gollwng yn ystod y cyfnod OREN.

Yn ogystal â'r glaw trwm, mae perygl difrifol o wyntoedd cryf. Mae disgwyl i wyntoedd ddod o gyfeiriad anarferol sy'n cynyddu'r posibilrwydd o darfu a'r perygl o goed yn cwympo, felly cymerwch ofal arbennig. Mae ardaloedd cyfagos o dan RYBUDD COCH am wynt, gyda'r posibilrwydd o hyrddiau cryf iawn

Tywydd

RHYBUDD MELYN: GLAW 15:00 HEDDIW – 03:00 DYDD SADWRN

RHYBUDD OREN: GLAW 03:00–18:00 DYDD SADWRN

RHYBUDD OREN: GWYNT 01:00–21:00 DYDD SADWRN

RHYBUDD MELYN: GWYNT 21:00 DYDD SADWRN – 06:00 DYDD SUL

Mae disgwyl i'r glaw sylweddol, ar ben yr amodau dirlawn presennol, achosi heriau ledled y rhanbarth.

Yr hyn rydyn ni wedi'i wneud / yn ei wneud

Rydyn ni'n deall pryderon y cyhoedd ac rydyn ni'n mynd ati'n rhagweithiol i ddosbarthu bagiau tywod i'r ardaloedd lle mae'r perygl mwyaf a welodd llifogydd yn ystod Storm Bert. Mae carfanau'n dosbarthu'r rhain ar hyn o bryd. Bydd carfanau'n gweithio drwy gydol y cyfnod, dros nos a dros y penwythnos, i ymateb i argyfyngau.

Bydd staff yn ein hystafell rheoli argyfyngau drwy gydol y cyfnod, a bydd camerâu teledu cylch cyfyng a larymau ar geuffosydd yn cael eu monitro.

Bydd carfanau ychwanegol, ochr yn ochr â chontractwyr, yn gweithio drwy gydol y cyfnod i ymateb i argyfyngau. Mae offer ychwanegol wedi'u cyflwyno i helpu, megis JCBs i glirio malurion o geuffosydd a choed os ydyn nhw'n cwympo.

Ers Storm Bert, mae ein hoffer glanhau gylïau a chwistrellu dŵr i gyd wedi bod ar waith bob awr o'r dydd i glirio draeniau, ac mae carfanau wedi symud cannoedd o dunelli o falurion a lifodd oddi ar lethrau'r mynyddoedd i geuffosydd.

Afonydd

Mae Cyfoeth Naturiol Cymru wedi codi perygl llifogydd Rhondda Cynon Taf i lefel CANOLIG ar gyfer dydd Sadwrn a dydd Sul, sy'n golygu bod disgwyl llifogydd. Dyma ragor o wybodaeth

Mae modd i chi gofrestru i dderbyn Rhybuddion Llifogydd gan Cyfoeth Naturiol Cymru yma.

Rhoi gwybod am broblem

Os oes perygl o niwed i fywyd, ffoniwch 999 bob tro.

Os oes perygl o niwed i fywyd, ffoniwch 999 bob tro. I roi gwybod i'r Cyngor am argyfwng, ffoniwch 01443 425011. Os oes gyda chi bryderon ond does dim perygl o niwed i berson neu eiddo, rhowch wybod gan ddefnyddio ffurflenni ar-lein:

Rhowch wybod i ni am rwystrau/coed sydd wedi cwympo yma
Rhowch wybod i ni am rwystrau mewn draeniau/ceuffosydd yma

Peidiwch â chysylltu â ni ar y cyfryngau cymdeithasol mewn argyfwng.

Cyngor ar ddiogelwch

Dylai eiddo a busnesau sydd ag offer amddiffyn rhag llifogydd wirio eu hoffer a'u gosod yn ôl yr angen, neu fod yn barod i'w defnyddio os oes angen.

Dylech chi baratoi eiddo sydd wedi dioddef llifogydd yn y gorffennol neu sydd mewn perygl o lifogydd. Dyma ragor o wybodaeth ar baratoi am lifogydd

Peidiwch â theithio oni bai bod y daith yn gwbl hanfodol. Bydd amodau gyrru anodd oherwydd gwynt a glaw. Mae disgwyl dŵr ar wyneb ffyrdd, a bydd gwyntoedd cryf yn debygol o achosi i goed gwympo.

Ffoniwch 01443 425011 i roi gwybod am unrhyw broblemau. Os oes perygl o niwed i fywyd, ffoniwch 999 bob tro.