Parc Gwledig Cwm Clydach yw'r llecyn hardd diweddaraf i gael budd o gynllun buddsoddi yng nghefn gwlad Cyngor Rhondda Cynon Taf, er budd trigolion ac ymwelwyr.
Erbyn diwedd y rhaglen buddsoddi, bydd £300,000 wedi'i fuddsoddi dros ddwy flynedd er mwyn cynnal gwaith clirio, rheoli chwyn a gordyfiant, codi ffensys a ffiniau, creu neu ddiogelu llwybrau, gosod seddi a meysydd picnic a sicrhau bod modd i bawb fwynhau mannau agored hardd.
Bydd Parciau Gwledig Cwm Clydach, Barry Sidings a Chwm Dâr - yn ogystal â'u hymwelwyr - oll yn elwa o'r gwelliannau a'r buddsoddiad.
Bydd y gwaith diweddaraf wedi'i gynllunio yn rhan o'r buddsoddiad parhaus yn cynnwys:
Gwared â choed helyg a choed bach/prysgoed eraill sy'n gordyfu ar hyd Nant Clydach, sy'n llifo o'r llyn uchaf (sy'n cynnwys y pwll plymio a'r rhaeadr) i'r llyn isaf (ger y caffi). Bydd y gwaith yn canolbwyntio ar y rhan rhwng y rhyd a'r llyn isaf.
Bydd y gwaith yn dechrau ddydd Llun, 8 Medi ac mae contractwyr yn amcangyfrif y bydd yn cymryd pythefnos i'w gwblhau (gan weithio drwy gydol y dydd, yn ystod yr wythnnos yn unig). Bydd mynediad yn cael ei gynnal drwy gydol y cyfnod yma, ond efallai bydd rhaid i'r contractwyr amgáu ardaloedd â ffens ger ochr y llwybr er mwyn cwblhau eu gwaith.
Dylai ymwelwyr â'r parc gwledig yn ystod y cyfnod yma fod yn gwbl ymwybodol bod gwaith yn cael ei gynnal, yn enwedig wrth fynd â chi am dro neu farchogaeth ceffyl ar hyd y llwybr.
Bydd gwaith pellach yn cynnwys gwared â chwyn o'r llyn gwaelod ddechrau mis Hydref. Ni fydd angen cau'r llwybr sy'n mynd o amgylch y llyn wrth gynnal y gwaith yma, a ni fydd yn effeithio ar y caffi a chyfleusterau'r gymuned.
Bydd dwy fainc picnic arall yn cael eu gosod yn y parc gwledig, yn ategol i'r pedair mainc sydd wedi'u gosod yn barod dros y misoedd diweddar.
Bydd cam diweddaraf y gwaith gwella yn dilyn cynlluniau blaenorol er mwyn gwella draeniad y llwybr sy'n cysylltu'r ddau lyn, amnewid y cerrig sarn ym mhen uchaf y llyn a gwella/atgyweirio'r llwybr o amgylch y llyn isaf.
Mae Parc Gwledig Cwm Clydach yn atyniad sylweddol i'r rheiny sy'n byw gerllaw a hefyd i ymwelwyr o ledled y DU, sy'n ymweld er mwyn mwynhau'r llynnoedd, y bywyd gwyllt, yr awyr agored a'r teithiau cerdded yn y dirwedd drawiadol o'i amgylch. Mae hefyd wedi dod yn fan poblogaidd ar gyfer nofio gwyllt, diolch i'r pwll yn y llyn uchaf.
Mae Lakeside Café, sy'n gweini amrywiaeth o brydau poeth ac oer, byrbrydau a diodydd - ar deras gyda golygfeydd hyfryd dros y llyn, yn ogystal â chyfleuster llogi beiciau mynydd, teithiau cerdded tywys a rhagor - wedi cadarnhau safle'r parc gwledig yn atyniad i bawb.
Yn yr un modd â phob parc gwledig yn Rhondda Cynon Taf - darllenwch ragor amdanyn nhw yma - mae'n hanfodol eu bod nhw'n cael eu cynnal a'u gwella lle bynnag fo modd, er mwyn sicrhau'r profiad gorau posib i ymwelwyr.
Mae'r Rhaglen Buddsoddi yng Nghefn Gwlad hefyd wedi sicrhau gwelliannau sylweddol ym Mharc Gwledig Cwm Dâr yn Aberdâr. Mae'r gwaith sydd wedi'i gwblhau yna yn cynnwys:
- Gosod ffensys a gatiau ar gyfer y maes carafanau a'r ganolfan ymwelwyr
- Ail-wynebu maes parcio'r llyn uchaf
- Gwelliannau i'r tarmac y tu allan i Ganolfan Farchogaeth Green Meadow er mwyn gwella diogelwch i gerddwyr
- Creu ardal redeg i gŵn
- Gwared â chwyn o'r llyn uchaf
- Cwblhau gwrych-furiau
- Gosod llawr newydd yn ardal y toiledau, y coridorau, yr ystafell gynhadledd, lolfa'r preswylwyr, yr ystafell hirgrwn ac ardal yr ystafell haul.
- Dodrefn newydd ar gyfer yr ystafell haul, yr ystafell gynhadledd a'r cwrt awyr agored
- Cyfleusterau golchi dillad newydd ar gyfer y maes carafanau
- Wedi addasu offer garddio ar gyfer aelod o staff sydd ag anabledd
Ym Mharc Gwledig Barry Sidings, yn dilyn cwblhau gwaith i wella'r maes parcio a thorri chwyn yn y pwll, mae gwaith pellach wedi'i gynllunio eleni er mwyn gwella'r llwybr beicio 'pwmp', gwella'r maes parcio er mwyn cynyddu'r capasiti a gwaith adfer y pwll er mwyn gwared â silt a gwella'r cloddiau a'r system draenio.
Meddai'r Cynghorydd Ann Crimmings, Aelod o Gabinet Cyngor Rhondda Cynon Taf ar faterion yr Amgylchedd a Hamdden: "Rydyn ni'n falch iawn o'n parciau gwledig hyfryd. Mae gyda phob un ohonyn nhw arlwy eu hunain sy'n sicrhau eu bod nhw'n atynnu ymwelwyr lleol ac o bell i fwynhau awyr iach, mannau agored hardd, bwyd blasus yn y caffis, llwybrau beicio mynydd, llwybrau cerdded, ardaloedd chwarae antur a rhagor.
"Dyma pam mae hi'n bwysig fod y Cyngor yn parhau i sicrhau buddsoddiad sydd nid yn unig yn sicrhau buddsoddiad yn y mannau awyr agored yma er budd pawb, ond yn gwella ac estyn eu harlwy."
Wedi ei bostio ar 18/09/2025