Mae pobl ifainc ledled Rhondda Cynon Taf wedi derbyn eu canlyniadau Uwch Gyfrannol, Safon Uwch, Tystysgrif Her Sgiliau Uwch a chymwysterau galwedigaethol lefel 3 heddiw (dydd Iau 13 Awst). Mae llawer ohonyn nhw wedi cael lle mewn prifysgol i barhau â'u hastudiaethau addysgol.
Ymhlith y bobl a oedd yn llongyfarch y disgyblion llwyddiannus a staff ysgolion roedd y Cynghorydd Sharon Rees, Aelod o Gabinet Cyngor Rhondda Cynon Taf ar faterion Addysg a Phobl Ifainc, a Marium Haque, Cyfarwyddwr Addysg a Gwasanaethau Cynhwysiant y Cyngor.
Meddai'r Cynghorydd Sharon Rees, Aelod o Gabinet Cyngor Rhondda Cynon Taf ar faterion Addysg a Phobl Ifainc: "Ar ran y Cyngor, hoffwn i longyfarch y bobl ifainc wrth iddyn nhw ddathlu diwedd eu holl waith caled, a staff yr ysgolion sydd wedi gweithio'n ddiflino i gyflawni canlyniadau heddiw.
"Rydyn ni'n edrych ymlaen at weld yr hyn y bydd y bobl ifainc yma’n ei gyflawni yn eu camau nesaf, boed hynny yn y brifysgol neu ym myd gwaith."
Meddai Marium Haque, Cyfarwyddwr Addysg a Gwasanaethau Cynhwysiant Cyngor Rhondda Cynon Taf: "Llongyfarchiadau i bob un o’r bobl ifainc sy’n derbyn eu canlyniadau Safon Uwch heddiw. Mae’r cyflawniadau yma’n ganlyniad llawer o waith caled, ymrwymiad a dyfalbarhad, a dylai pawb fod yn hynod o falch.
“Hoffwn hefyd gydnabod ymroddiad ein hathrawon, staff cymorth a theuluoedd, y mae eu hanogaeth a’u harweiniad wedi chwarae rhan bwysig wrth helpu ein pobl ifainc i gyrraedd y garreg filltir yma.
I unigolion sydd heb gyflawni’r canlyniadau yr oedden nhw’n gobeithio amdanyn nhw, neu sy’n ansicr ynghylch beth sy’n dod nesaf, mae cymorth ar gael i chi. Siaradwch â’ch ysgol neu goleg, lle y gall staff roi cyngor a’ch helpu i nodi’r llwybr gorau ymlaen.”
Mae'r Cyngor yn cydnabod holl gyraeddiadau cadarnhaol ysgolion Rhondda Cynon Taf a'u pobl ifainc, gyda llawer yn cael eu derbyn i'r brifysgol, i leoliadau addysg bellach, i brentisiaethau ac i swyddi. Dyma ddechrau pennod newydd gyffrous yn eu bywydau.
Mae cymorth a chyngor parhaus ar gael i unigolion sy’n ansicr ynghylch eu camau nesaf – a hynny gan staff yr ysgolion a Gyrfa Cymru.
Mae modd dod o hyd i gymorth pellach yma: Cefnogaeth i Fyfyrwyr CBAC
Wedi ei bostio ar 13/08/2026