Mae Cyngor Rhondda Cynon Taf wedi croesawu menter Arbedion Haf Prydain Fawr ("Great British Summer Savings") Llywodraeth y DU. Yn rhan o'r cynllun yma, bydd y Llywodraeth yn gostwng TAW ar ystod eang o weithgareddau i'r teulu, gan helpu trigolion i fwynhau diwrnodau allan i'r teulu mwy fforddiadwy ledled y Fwrdeistref Sirol yr haf yma.
O 25 Mehefin i 1 Medi 2026, bydd costau TAW ar atyniadau cymwys, gan gynnwys tocynnau theatr, cyngherddau, sioeau a lleoliadau eraill sy'n addas i deuluoedd, yn cael ei ostwng o 20% i 5%, ochr yn ochr ag arbedion ar brydau i blant a gweithgareddau eraill a gynlluniwyd i hybu fforddiadwyedd i deuluoedd.
Bydd y fenter yn cefnogi lleoliadau diwylliannol lleol, gan gynnwys Theatr y Parc a'r Dâr, Theatr y Colisëwm, ac atyniadau eraill yn ein cymunedau ledled Rhondda Cynon Taf, gan annog trigolion ac ymwelwyr i ailddarganfod yr hyn sydd gan yr ardal i'w gynnig!
Dywedodd y Cynghorydd Scott Emanuel, yr Aelod o'r Cabinet ar faterion Hamdden, Twristiaeth a Diwylliant:
“Bydd y fenter yma'n ei gwneud hi’n haws i deuluoedd fwynhau amser gyda’i gilydd yn ystod gwyliau’r haf. Bydd prisiau tocynnau is ar gyfer theatrau ac atyniadau lleol yn helpu mwy o bobl i brofi'r hyn sydd gyda ni i'w gynnig yma yn Rhondda Cynon Taf.
“Mae ein theatrau a’n lleoliadau yn chwarae rhan hanfodol yn ein cymunedau, nid yn unig o ran darparu adloniant, ond o ran cefnogi swyddi, busnesau lleol a'r economi ymwelwyr ehangach.
“Mae gan Theatrau RhCT amrywiaeth wych o sioeau i’r teulu cyfan, felly gwnewch yn siŵr eich bod chi’n bwrw golwg ar yr hyn sydd ar gael.”
Cliciwch ar y ddolen yma i ddysgu rhagor: https://rct-theatres.co.uk/cy/
Mae cynllun Llywodraeth y DU wedi'i gynllunio i leddfu'r pwysau costau byw y mae trigolion yn eu hwynebu yn ogystal â chefnogi busnesau sy'n dibynnu ar ymwelwyr yn ystod yr haf.
Mae'r Cyngor yn parhau i fuddsoddi yn ei wasanaethau diwylliannol a hamdden, gan sicrhau profiadau hygyrch ac o ansawdd uchel i bobl o bob oed a bydd yn gweithio gyda phartneriaid a lleoliadau ledled y fwrdeistref sirol i hyrwyddo'r gwasanaethau yma a sicrhau bod trigolion yn effro i'r arbedion sydd ar gael.
Wedi ei bostio ar 23/07/2026