Mae'r Cyngor yn brysur gyda'i raglen torri gwair yn ystod yr haf, wrth warchod ein Lleiniau Glas (Ardaloedd Bioamrywiaeth) ar yr un pryd.
Mae yna nifer o Ardaloedd Bioamrywiaeth dynodedig yn rhan o’n lleiniau glas ledled y Fwrdeistref Sirol. Mae’r rhain yn cael eu torri unwaith y flwyddyn yn unig, naill ai ddiwedd mis Gorffennaf neu yn yr hydref, gan ddefnyddio peiriannau torri a chasglu arbenigol.
Mae gwarchod ein Hardaloedd Bioamrywiaeth yn helpu i annog blodau gwyllt i dyfu ac yn ategu peillio. Mae hyn yn rhan o ymrwymiad y Cyngor i fynd i'r afael â'r Newid yn yr Hinsawdd ac rydyn ni'n annog pob preswylydd a busnes i'n cefnogi ni a'n helpu i wneud gwahaniaeth go iawn.
Mynd i'r afael â Newid yn yr Hinsawdd yn RhCT
Mae'r Cyngor, sydd â'r nod o fod yn Garbon Niwtral erbyn 2030, eisoes wedi gwneud cynnydd mawr dros y ddegawd ddiwethaf yn ei ymdrechion i leihau carbon. Mae hyn wedi cynnwys gosod dros 100 o baneli solar, yn ogystal â gosod systemau gwres a phŵer ynni-effeithlon cyfun sy'n cynhyrchu gwres a thrydan ar yr un pryd o'r un ffynhonnell ynni, gosod boeleri effeithlon iawn, uwchraddio systemau gwresogi, awyru ac aerdymheru, a newid i oleuadau LED sy'n defnyddio llai o ynni mewn adeiladau a goleuadau stryd.
Meddai'rCynghorydd Ann Crimmings, Cabinet Member for Environment & Leisure: "Fel Cyngor rydyn ni wedi ymrwymo i fuddsoddi yn ein mannau gwyrdd ac i storio carbon drwy ddefnyddio dulliau naturiol, megis y rheiny sy'n ymwneud â choed, mawnogydd, glaswelltir corsiog a chynefinoedd naturiol eraill ledled y Fwrdeistref Sirol i wella ansawdd aer a lleihau effaith nwyon tŷ gwydr.
"Ond mae mynd i'r afael â'r Newid yn yr Hinsawdd yn parhau i fod yn broblem fyd-eang ac yn argyfwng y mae modd i ni i gyd wneud rhywbeth yn ei gylch, a does dim ots os yw'n fawr neu'n fach. Nod y Cyngor hwn yw gwneud gwahaniaeth go iawn – mae newid yn dechrau yma, gyda phob un ohonon ni.
"Bydd pob newid syml a wnawn ni i gyd yn gwneud gwahaniaeth mawr. Dyma'n dyletswydd ni i genedlaethau'r dyfodol."
Amserlenni Torri Gwair RhCT
Mae Cyngor Rhondda Cynon Taf hefyd yn parhau i weithredu ei bolisi rheoli glaswelltir er lles blodau gwyllt, gyda chyfanswm o 120 hectar o laswelltir blodau gwyllt bellach yn cael ei reoli ar draws y Fwrdeistref Sirol – tir sy'n cyfateb i ychydig dros 126 gwaith maint cae Stadiwm Principality. Mae'r Cyngor hefyd yn creu hyd at wyth ‘Ystafell Ddosbarth â Tho Gwyrdd’ ar safleoedd ysgol sydd heb fawr o natur neu sydd heb fynediad o gwbl ati, ac wedi creu ardal dyfu gymunedol o'r enw ‘Gadael i Natur Dyfu’ ym Mharc Coffa Ynysangharad, Pontypridd.
Bioamrywiaeth yn Rhondda Cynon Taf
Mae Cyngor Rhondda Cynon Taf wedi ymrwymo i chwarae ei ran i fynd i'r afael â'r Newid yn yr Hinsawdd – ond mae angen eich help chi arnon ni i gyflawni ein nodau a gwneud gwahaniaeth.
Dyma fater i bawb!
Yn ystod y blynyddoedd diwethaf, mae'r Cyngor wedi ehangu’r ardaloedd o laswelltir blodau gwyllt a lleiniau glas wedi’u rheoli yn sylweddol trwy ei Bolisi Rheoli Glaswelltir er lles Blodau Gwyllt RhCT. Ar hyn o bryd mae tua 150 o safleoedd sy'n rhan o Gynllun Blodau Gwyllt y Cyngor.
Wedi ei bostio ar 29/07/2022