Bwriwch olwg ar ein hachlysuron eleni!

Mae calendr achlysuron 2025 ar gael a bydd rhai o'ch hoff achlysuron yn ôl unwaith eto! Mae rhywbeth ar gyfer pob tymor ac eleni, yn ôl yr arfer, yr achlysur cyntaf fydd Ŵy-a-sbri'r Pasg. Yno, bydd Bwni'r Pasg yn dychwelyd i'w gynefin yn Amgueddfa Parc Treftadaeth Cwm Rhondda ar 24 a 25 Ebrill. Bydd tocynnau ar werth trwy wefan www.parctreftadaethcwmrhondda.com - cadwch lygad allan ar dudalen Faceboook, Instagram ac 'X' @whatsonrct i gael gwybod pryd bydd tocynnau ar werth.

Bydd Gŵyl Aberdâr yn cael ei chynnal ddydd Sadwrn 24 Mai eleni, a bydd yna gerddoriaeth byw, adloniant i blant a hwyl a sbri yn y ffair! Mae modd trefnu stondin ar gyfer yr achlysur trwy lenwi'r ffurflen gais sydd ar gael ar www.gwylaberdar.co.uk

Mae 8 Mai yn nodi 80 mlynedd ers Diwrnod Buddugoliaeth yn Ewrop - diwrnod olaf yr Ail Ryfel Byd yn Ewrop. Byddwn ni'n ymuno â dathliad cenedlaethol wrth i oleufâu gael eu goleuo ledled y DU i goffáu'r diwrnod arbennig yma. Mae cynlluniau hefyd ar y gweill ar gyfer achlysur dathlu ym Mharc Coffa Ynysangharad ar 10 Mai 2025. Bydd rhagor o wybodaeth am y seremoni goleuo'r goleufâu a'r achlysur dathlu ar gael yn nes at yr amser.

Byddwn ni'n dychwelyd i Amgueddfa Parc Treftadaeth Rhondda ar gyfer dechrau tymor yr haf ar 28 Mehefin ar gyfer y Sioe Ceir Clasur boblogaidd. Achlysur perffaith i'r rheiny ohonoch ch sy'n dwlu ar geir clasur!

Ewch i Barc Coffa Ynysangharad ym mis Awst i fwynhau danteithion blasus ac adloniant! Ar ôl seibiant y llynedd, mae ein hachlysur blaenllaw, Cegaid o Fwyd Cymru, yn dychwelyd unwaith yn rhagor ar 2 a 3 Awst. Cadwch lygad allan am y newyddion diweddaraf a gwnewch gais am stondin nawr ar wefan www.cegaidofwydcymru.co.uk

Dewch i deimlo ofn ar 29 a 30 Hydref wrth i Amgueddfa Parc Treftadaeth Cwm Rhondda ddathlu Calan Gaeaf yn Rhialtwch Calan Gaeaf.

Mae dechrau mis Tachwedd yn amser i gofio wrth i wasanaethau a chyngherddau gael eu cynnal ledled y wlad i goffáu cyfraniad dynion a menywod lluoedd arfog Prydain a'r Gymanwlad yn y ddau Ryfel Byd a rhyfeloedd diweddarach. Bydd Gŵyl Gofio yn cael ei chynnal ar 1 Tachwedd a bydd rhagor o fanylion am y gyngerdd yma'n cael eu cyhoeddi yn ddiweddarach yn y flwyddyn. Bydd Gwasanaeth a Gorymdaith Sul y Cofio Pontypridd yn cael eu cynnal ar 9 Tachwedd.

Mae'r flwyddyn brysur yma'n gorffen gyda dathliadau'r Nadolig a'r Rasys Nos Galan byd-enwog. Bydd Ogof Siôn Corn yn Amgueddfa Parc Treftadaeth Cwm Rhondda rhwng 22 Tachwedd a Noswyl Nadolig a bydd achlysuron Nadoligaidd yn cael eu cynnal yng nghanol ein trefi drwy gydol Tachwedd a Rhagfyr. Caiff tân gwyllt eu cynnáu i ddathlu'r rhedwyr hynny fydd yn cymryd rhan yn Rasys Nos Galan yng nghanol tref Aberpennar. Pwy fydd y Rhedwr Dirgel yn 2025? Galwch heibio i gael gwybod!

Meddai'r Cynghorydd Bob Harris, Aelod o'r Cabinet ar faterion Iechyd y Cyhoedd a Chymunedau: 

Mae'r calendr achlysuron yn fwy llawn nag erioed yn 2025. Daeth dros 250,000 o drigolion ac ymwelwyr i fwynhau achlysuron yn 2024 a oedd wrth gwrs yn cynnwys Eisteddfod Genedlaethol Cymru. Y gobaith yw y bydd ymwelwyr yn dychwelyd eleni i fwynhau'r achlysuron gwych sydd gyda ni i'w cynnig yma yn Rhondda Cynon Taf. Mae Cegaid o Fwyd Cymru a Gŵyl Aberdâr yn boblogaidd bob blwyddyn – yn ogystal â'n hachlysuron sy'n addas i deuluoedd! Rydyn ni'n gobeithio gweld rhagor o drigolion yn dod i fwynhau beth sydd i'w gynnig drwy gydol y flwyddyn yn Rhondda Cynon Taf. Mae cymaint i'w weld yn ein parciau a lleoliadau drwy gydol y flwyddyn. Rwy'n edrych ymlaen at flwyddyn arbennig o adloniant yn 2025!

Dyma'r rhaglen lawn ar gyfer 2025:

I gael y newyddion diweddaraf, cyhoeddiadau a rhagor, dilynwch @whatsonrct ar Facebook, Instagram ac 'X'.